Taldyqorǵanda 6 jasar qyzdy zorlamaq bolǵan er adam izdestirilip jatyr
TALDYQORǴAN. KAZINFORM — Jetisý oblysynda 6 jasar búldirshinge azǵyndyq is-áreket jasamaq bolǵan er adam izdestirilip jatyr. Onyń kópqabatty úıdiń kireberisinde kishkentaı qyzdyń shalbaryn sheshpek bolǵanyn jáne aýladaǵy basqa da qyzdardyń beli men bóksesin ustaǵanyn sol mańdaǵy turǵyndar aıtýda.
Oqıǵa 22 qyrkúıek kúni Taldyqorǵan qalasynda bolǵan. Turǵyndardyń aıtýynsha 9-shaǵynaýdandaǵy 21-úıdiń kireberisinde belgisiz erkek 6 jasar búldirshinniń shalbaryn sheshýge áreket jasaǵan.
Sol mezette syrttan kirgen turǵyndardy kórgen azǵyn qasha jónelgen.
Aýlaǵa bir de bir kamera qoıylmaǵan. Al, oqıǵa bolǵan úıdiń kireberisinde turǵan jalǵyz kamera istemeıdi.
«Ol búldirshin — meniń tanysymnyń qyzy. Ózi jýas. Óz betimen júgirip oınaıtyn qyz bolǵan. Sony myna úıge alyp kirip, azǵyndyq oıyn iske asyrmaqshy bolǵan. Bala sheshesine 1 saǵattan soń bir-aq aıtqan. Shoshynyp qalǵan eken. Kıimin kindigine deıin kóterip tastaǵan. Estigenim osy. Ulymyz da, qyzymyz da bar, qorqamyz. Kamera qoıý kerek qoı. Bul — qaraýsyz qalǵan aýdan. Ákimge barsań áskerı bólimge silteıdi, áskerı bólim ákimge silteıdi» — deıdi qala turǵyny Dana Omarova.
Sol aralyqta 33-úıdiń aýlasynda oınap júrgen kishkentaı qyz balalar da ata-anasyna bóten er adamnyń belinen ustap, bóksesine qol tıgizgenin aıtqan.
21-úıde bolǵan jaǵdaıǵa baılanysty Jetisý oblystyq polıtsııa departamenti búkil jeke quram men bólingen kúshter kúdiktini izdeýge jumyldyrylǵanyn málimdedi.
Eske salaıyq buǵan deıin Jetisýda ákimniń basy daýǵa qalǵanyn jazǵanbyz.
