Taldyqorǵanda 56 jastaǵy er adamnyń máıiti tabyldy
ASTANA. KAZINFORM — Taldyqorǵandaǵy kóshelerdiń birinen er adamnyń máıiti tabyldy, onyń kim ekeni anyqtaldy.
Polıtsııanyń málimetinshe, máıit 56 jastaǵy jergilikti turǵyndiki bolyp shyqty.
Ol spırttik ishimdikti shamadan tys tutynatyn adam retinde profılaktıkalyq esepte turǵan.
Er adamnyń máıitin tańerteń jumysqa shyqqan kommýnaldyq qyzmetker Qabanbaı batyr kóshesi boıynan baıqaǵan.
Áıel adam oqıǵa týraly birden polıtsııaǵa habarlaǵan.
Qazirgi ýaqytta quqyq qorǵaý organdary oqıǵanyń mán-jaıyn anyqtap jatyr.
— Er adamnyń jeke basyna qatysty derekter anyqtaldy. Ol spırttik ishimdikti shamadan tys tutynatyn 56 jastaǵy jergilikti turǵyn bolyp shyqty. Máıitten zorlyq-zombylyq belgileri baıqalmady. Ólimniń naqty sebebi anyqtalyp jatyr, — dep habarlady Kazinform tilshisine polıtsııa departamentiniń baspasóz qyzmeti.
Osyǵan deıin Taldyqorǵanda joǵalyp ketken balanyń denesi Qaratal ózeninen tabylǵany týraly jazǵan edik.
