Taldyqorǵanda 5 jasar qyzyn qaýipti jaǵdaıda tasymaldaǵan áke jaýapqa tartyldy
ASTANA. KAZINFORM — Taldyqorǵanda polıtsııa qyzmetkerleri JBO kameralary arqyly balany tasymaldaý kezinde qaýipsizdik talaptarynyń buzylǵanyn anyqtady.
Beınejazbadan 31 jastaǵy júrgizýshiniń Changan X5 Plus avtokóligin basqaryp kele jatyp, bes jasar qyzyn kóliktiń joǵarǵy bóligindegi ashyq qýystan syrtqa shyǵaryp qoıǵanyn kórýge bolady.
Kishkentaı qyzdyń denesi beline deıin syrtqa shyǵyp turǵan. Atalǵan fakti boıynsha júrgizýshi, ıaǵnı balanyń ákesi ákimshilik jaýapkershilikke tartyldy. Polıtsııa qyzmetkerleri balanyń ata-anasymen profılaktıkalyq áńgime júrgizip, mundaı áreketke jol berilmeıtinin túsindirdi.
Júrgizýshige balalardy tasymaldaý kezinde qaýipsizdik talaptaryn qatań saqtaý jáne balanyń ómiri men densaýlyǵyna qaýip tóndiretin jaǵdaılarǵa jol bermeý qajettigi eskertildi.
Polıtsııa eskertedi: balalardy tasymaldaý kezinde barlyq qaýipsizdik talaby qatań saqtalýy tıis. Ata-analar men júrgizýshiler balanyń ómiri men densaýlyǵyna jaýapty. Sondyqtan balany kólikpen tasymaldaý kezinde onyń qaýipsizdigin tolyq qamtamasyz etý qajet.
Taldyqorǵanda áıeline kúsh kórsetken qarýly adam ustalǵanyn jazǵan edik.
