Taldyqorǵanda 4,5 keli mefedronmen ustalǵan azamat 10 jylǵa sottaldy
ASTANA. KAZINFORM — Jetisý oblysynda mefedron óndiretin jasyryn esirtki zerthanasyn uıymdastyrǵan Shyǵys Qazaqstan oblysynyń turǵyny 10 jylǵa bas bostandyǵynan aıyryldy. Tintý kezinde odan 4,5 kılogramnan astam psıhotroptyq zat tárkilengen. Bul týraly óńirdegi prokýratýra málim etti.
Jetisý oblysynyń qylmystyq ister jónindegi mamandandyrylǵan aýdanaralyq sotymen Shyǵys Qazaqstan oblysynyń turǵynyna qatysty aıyptaý úkimi shyǵaryldy. Ol adamdar tobynyń aldyn ala sóz baılasýy boıynsha ótkizý maqsatynda asa iri mólsherde psıhotroptyq zattardy zańsyz daıyndaǵany úshin kináli dep tanyldy.
— Sottalǵan azamat 2025 jyly «Telegram» messendjeri arqyly baılanysta bolǵan adamdardyń usynysymen Taldyqorǵan qalasyna kelip, jeke úıdi jalǵa alǵan jáne onda mefedron daıyndaıtyn jasyryn zerthana uıymdastyrǵan, — delingen habarlamada.
Tintý barysynda 4,5 kılogramnan astam mefedron anyqtalyp, tárkilengen.
Memlekettik aıyptaýshy usynǵan dáleldemelerdi, sondaı-aq asa aýyr qylmystyń sıpaty men qoǵamdyq qaýiptilik dárejesin eskere otyryp, sot prokýratýranyń ustanymyn qoldap, oǵan 10 jyl merzimge bas bostandyǵynan aıyrý túrindegi jaza taǵaıyndady.
Úkim zańdy kúshine engen joq.
Jetisý oblysynyń prokýratýrasy esirtki zattaryn daıyndaýmen, ótkizý maqsatynda saqtaýmen kelgen «jeńil aqsha» aýyr zardaptarǵa ákeletinin eskertedi. Mundaı áreketter asa aýyr qylmys bolyp tabylady jáne ol úshin 15 jylǵadeıin bas bostandyǵynan aıyrý túrindegi jaza kózdelgen.
Aıta keteıik, byltyr Qostanaıda 214 adam esirtki qylmysy úshin sottaldy.
