Taldyqorǵanda 400-den astam desantshy alǵash ret parashıýtpen sekirdi

Jas sarbazdar úshin bul áýe-desanttyq daıarlyqtyń mańyzdy kezeńi ári minez-qulyq pen erik-jigerdi synaıtyn naǵyz synaq boldy.

Sekirýler 800 metr bıiktikten, qaýipsizdik sharalaryn qatań saqtaı otyryp jáne tájirıbeli nusqaýshylardyń turaqty baqylaýymen oryndaldy. Daıyndyqtyń barlyq kezeńi aldyn ala muqııat pysyqtaldy.

18404 áskerı bólimi komandırniń áýe-desanty daıarlyǵy jónindegi orynbasary podpolkovnık Bekdáýlet Ospanov sekirýler aldynda barlyq desantshylar tolyqtaı jerústi daıarlyq kýrsynan ótkenin atap ótti.

— Sarbazdar parashıýt júıesiniń qurylysyn oqyp, áýedegi jáne jerdegi áreket etý tártibin pysyqtady. Qaýipsizdik sharalaryna erekshe nazar aýdaryldy. Sekirýge tek daıyndyqtyń barlyq elementterin jetik meńgergen áskerı qyzmetshiler ǵana jiberildi. Biz úshin árbir jaýyngerdiń áýege tolyq daıyndyqpen, sabyrly ári senimdi túrde kóterilgeni mańyzdy, — dedi ol.

Qarqyndy oqý-jattyǵý shamamen alty aıǵa sozyldy. Osy ýaqyt ishinde jas desantshylar teorııalyq jáne psıhologııalyq daıyndyqtan ótti. 18404 áskerı bólimi bazasynda júrgizilgen bul oqý kezeńi olardyń jan-jaqty daıarlyǵyn qamtamasyz etti.

Tájirıbeli nusqaýshylardyń aıtýynsha, dál osy kezeńde áskerı qyzmetshilerde dene daıyndyǵy, tártiptilik, ózine senimdilik jáne kúızelis jaǵdaıyna tózimdilik sekildi qajetti qasıetter qalyptasady.

— Árıne, qobaljý boldy, sonymen birge ózimdi jeńýge degen úlken yntany da sezindim. Parashıýt ashylǵannan keıin sózben aıtyp jetkizý qıyn sezim paıda bolady eken. Bul meniń ómirimdegi umytylmaıtyn sát, — dedi merzimdi qyzmettiń sarbazy qatardaǵy jaýynger Birjan Abaı.

Osylaısha alǵashqy parashıýttik sekirýlerdi sátti oryndaǵan áskerı qyzmetshiler naǵyz desantshy qataryna qosylyp, jańa synaqtarǵa daıyn ekenderin dáleldedi.

Aıta ketelik Astanada Qorǵanys mınıstriniń orynbasary áskerı bólimderdi teksergen edi.