Taldyqorǵan-Úsharal gaz qubyry jelilik bóliginiń qurylysy aıaqtaldy
TALDYQORǴAN. KAZINFORM – Jetisý oblysyna jumys saparymen kelgen «QazaqGaz» UK» AQ Basqarma tóraǵasy Sanjar Jarkeshov «Taldyqorǵan-Úsharal» magıstraldy gaz qubyry qurylysynyń barysymen tanysty.
Resmı qonaqtardy Aqsý aýdanyndaǵy qurylys alańyna oblys ákiminiń orynbasary Áset Qanaǵatov bastap bardy. Belgili bolǵandaı, «Taldyqorǵan - Úsharal» gaz qubyrynyń jelilik bóligin salý jumystary aıaqtalǵan. Qazir avtomatty gaz taratý stantsııalary turǵyzylýda.
Aldymen «Jansúgirov» AGTS-ynyń alańyna barǵan resmı qonaqtar mundaǵy atqarylyp jatqan jumystarmen tanysty. Bul rette Sanjar Jarkeshov birinshi kezekte jumystyń sapasyna basa kóńil bólýdi qatań tapsyrdy.
- «Búgingi kúni «Taldyqorǵan – Úsharal» magıstraldy gaz qubyryn salýǵa úlken nazar aýdarylyp otyr. Bul - Memleket basshysynyń tapsyrmasymen, Ulttyq qordyń qarjylaı qoldaýymen qolǵa alynǵan aýqymdy joba. Ótken jyly Úkimet basshysy Jetisý oblysyna kelgende qurylys jumystary bastalǵan bolatyn. Jobanyń áleýmettik mańyzyn eskere otyryp, jumystardy qarqyndy júrgizdik. Sonyń nátıjesinde jobany belgilengen merziminen bir jarym jyl buryn, ıaǵnı 2025 jyldyń jylytý maýsymyna deıin bitiremiz dep josparlap otyrmyz. Bul «QazaqGaz», oblys ákimdigi jáne merdiger kompanııa – úsh taraptyń birlesken úlgili komandalyq jumysynyń nátıjesi», - dedi «QazaqGaz» UK» «QazaqGaz» UK» AQ Basqarma tóraǵasy Sanjar Jarkeshov.
Aıta keteıik, jobaǵa QR Energetıka mınıstrligi, Samuryq-Qazyna qory men Jetisý oblysynyń ákimdigi qoldaý bildirdi.
Atap ótsek, jobanyń tehnologııalyq shemasyna sáıkes, gaz qubyrynyń jalpy uzyndyǵy 302,441 km quraıdy, jobalyq qysymy RR=9,8 MPa. Jobada sondaı-aq 6 gaz qubyry-burmasyn jáne «Jansúgirov», «Qapal», «Sarqan», «Qoılyq», «Qabanbaı», «Úsharal» - 6 avtomatty gaz taratý stantsııasyn salý kózdelgen.
Búgingi tańda jańa gaz qubyrynyń jelilik bóliginiń qurylysy aıaqtaldy. Sondaı-aq, kedergilerden ótetin ýchaskelerdi: kúrdeli tabıǵı bederler, sý asty ótkelderi jáne t. b.salý boıynsha jumystar aıaqtalý satysynda.
Qazirgi tańda barlyq alty avtomatty gaz taratý stantsııalarynyń qurylystary qatar bastaldy. Stantsııalardyń daıyndyǵy osy jyldyń tamyz aıyna josparlanǵan. Qurylysqa 148 birlik arnaıy tehnıka men 356 jumysshy personal jumyldyryldy. Qurylys jumystary erekshe baqylaýda jáne kesteden ozyp keledi.