Taldyqorǵan — Tekeli tasjolynda júrip kele jatqan kóliktiń ústine aǵash qulady
ASTANA. KAZINFORM — Taldyqorǵan — Tekeli tasjolynda júrip kele jatqan jeńil kóliktiń ústine alyp aǵash qulap, júrgizýshi jaraqat aldy, dep habarlaıdy Kazinform agenttiginiń tilshisi.
Jetisý oblysy Tótenshe jaǵdaılar departamentiniń málimetinshe, oqıǵa 21 shilde kúni Qarabulaq — Tekeli avtojolynyń «Ómir bulaq» aýmaǵynda bolǵan. Qatty jeldiń saldarynan aǵash joldyń ústine qulap, qozǵalyp kele jatqan Toyota Camry avtokóligin basyp qalǵan.
Kólik salonynda bes adam bolǵan. Oqıǵa saldarynan júrgizýshi jaraqat aldy. TJD málimetinshe, kólikte qysylyp qalǵan adamdar bolmaǵan.
Tótenshe jaǵdaılar departamentiniń qyzmetkerleri oqıǵa ornyna jedel jetip, qulaǵan aǵashty kesip, joldy tazartty jáne kólik qozǵalysynyń qaýipsizdigin qamtamasyz etti.
Eskeldi aýdany ákimdiginiń habarlaýynsha, zardap shekken júrgizýshi Eskeldi aýdandyq ortalyq aýrýhanasyna jetkizilgen. Qazirgi ýaqytta onyń jaǵdaıy turaqty dep baǵalanyp otyr.
Jetisý oblysynyń TJD júrgizýshilerdi qatty jel kezinde erekshe saq bolýǵa, qaýipsiz jyldamdyqty saqtaýǵa jáne jolǵa aǵashtar men basqa da zattardyń qulaý qaýpin eskerýge shaqyrdy.
Eske salaıyq, buǵan deıin Ekibastuzda 19 shildede bolǵan burshaq pen daýyldy jelden keıin jergilikti aýqymdaǵy tabıǵı sıpattaǵy tótenshe jaǵdaı rejımin engizý josparlanyp otyrǵany habarlanǵan edi.
