Taldyqorǵan teatrynyń qoıylymdaryn 60 myńnan astam kórermen tamashalaǵan
Bıyl Bıken Rımova atyndaǵy Taldyqorǵan drama teatry kórermenderdiń jıi baratyn súıikti ornyna aınaldy. Ótken jyly teatrǵa 45 myń adam kelse, bıyl kórermen sany 60 myń adamǵa jetti, dep habarlaıdy Kazinform.
Óńirdegi biregeı óner ujymy qol jetkizgen shyǵarmashylyq jetistikter de az emes.
Teatr ujymy halyqaralyq festıvalderge qatysyp bıik belesterdi baǵyndyryp júr. Jańashyldyq ta jetkilikti.
«Qazan aıynda Almaty qalasynda ótken I Halyqaralyq „ALMATY PUPPET FESTIVAL“ qýyrshaq teatrlary festıvaline V.Vorobevtyń „Qyrsyq“ eksperımentaldy qýyrshaq qoıylymymen qatystyq. Bul jarty ǵasyrǵa jýyq tarıhy bar kıeli orda úshin úlken jańalyq bolyp otyr. Sebebi, teatrymyzdyń repertýarynda alǵash ret qýyrshaq qoıylymy sahnalansa, ári atalmysh qoıylym tuńǵysh ret halyqaralyq deńgeıde ótken qýyrshaq teatrlary festıvaline qatysty», — deıdi teatr dırektory Erlik Jýasbek.
Jaqynda túrkitildes elderdiń basyn qosqan halyqaralyq festıvali boldy.
Túrikmenstan astanasynda ótken rýhanı is-sharada túrkitildes aǵaıynnyń nazaryna Taldyqorǵan teatry «Qorǵansyzdyń kúni» qoıylymyn usyndy.
«Bul óner báıgesine qatysý arqyly teatrymyz shet eldik áriptesterimizben tájirıbe almasty. Akterler sheberlik shyńdap, jańa nárse úırenip, qazaq teatr óneriniń jańa baspaldaǵyna qadam jasady», — deıdi teatr aktrısasy Aıgerim Bektemirova.
Halyqaralyq festıvalge Tatarstan, Qyrǵyzstan, Ózbekstan, Tájikstan memleketterinen óner ujymdary keldi.
Joǵary dárejede óner kórsetken Taldyqorǵan drama teatry ujymy mınıstrlik pen festıvaldiń arnaıy kýbogymen jáne TÚRKSOI halyqaralyq uıymynyń dıplomymen marapattaldy.
