Taldyqorǵan-Óskemen tranzıttik dáliziniń birinshi ýchaskesinde jańa tórt jolaqty jol ashyldy
ASTANA. KAZINFORM – «Taldyqorǵan-Óskemen» halyqaralyq tranzıttik dáliziniń birinshi ýchaskesinde ashylǵan jańa tórt jolaqty jol elimizdiń transporttyq ınfraqurylymy úshin mańyzdy sharalardyń biri.
«QazAvtoJol» ulttyq kompanııasy «Taldyqorǵan — Óskemen» avtojolynyń qaıta jańartý jumystaryn jalǵastyrýda. Ol «Almaty — Taldyqorǵan — Óskemen — Shemonaıha — RF shekarasy, Barnaýlǵa qaraı» halyqaralyq tranzıttik dáliziniń bóligi, uzyndyǵy 1210 shaqyrymdy quraıdy.
Búgin Taldyqorǵan qalasyn Qyzylaǵash aýylymen baılanystyratyn uzyndyǵy 38 shaqyrym quraıtyn jańa tórt jolaqty jol ashyldy. Onyń 32 shaqyrymy birinshi tehnıkalyq sanatqa jatady. Bul tranzıttik dáliz Ortalyq Azııa men Qytaıdy Reseıdiń shyǵys aımaqtarymen jáne Qıyr Shyǵyspen baılanystyryp, saýda-ekonomıkalyq qatynastarǵa jańa múmkindikterdi ashady.
«Uzyndyǵy 768 shaqyrym bolatyn „Taldyqorǵan — Óskemen“ avtojolynyń qaıta jańartý jumystary qarqyndy júrip jatyr, onyń 314 shaqyrymy Jetisý oblysy arqyly ótedi. Oblysta jol jabynynyń tómengi qabatyn tóseý jumystary aıaqtalyp, ústińgi qabatyn qıyrshyq tas-mastıkalyq asfaltbetonmen tóseý jumystary jalǵasýda. Qazirgi tańda 300 shaqyrym jol tóseldi, bul josparlanǵan kólemniń 96 paıyzyn quraıdy», — dep jazdy QazAvtoJoldan.
Joba jumystaryna 5 asfaltbeton zaýyty, 490 birlik jol-qurylys tehnıkasy men 600-den asa maman jumyldyrylǵan. 79 jasandy nysan salý josparlanýda, onyń ishinde 22 kópir, 54 malótekel men 3 transporttyq jol aıryǵy, sondaı-aq káriz júıesi úshin 323 sýótkizgish qubyrlar.
Jol paıdalanýshylardyń qolaıly qozǵalysy úshin 12 demalys oryn men 10 zamanaýı sanıtarlyq-gıgıenalyq torap salý josparlanǵan, onyń tórteýi qoldanysqa berildi.
Joldyń qalǵan ýchaskeleri kezeń-kezeńmen jyldyń sońyna deıin aıaqtalyp, júk tasymaly men jolaýshylar úshin qaýipsiz ári qolaıly qozǵalysty qamtamasyz etetin bolady.
