Taldyqorǵan men Tekeli arasynda jolaýshylar poıyzy qatynaı ma — Kólik mınıstrligi jaýaby
ASTANA. KAZINFORM — Kólik mınıstrligi Májilis depýtattarynyń Taldyqorǵan men Tekeli arasyn jalǵap jatqan temir jol jelisin jolaýshylar úshin de paıdalanýǵa múmkindik jasaý usynysyna jaýap berdi.
Aıta keteıik, májilismender Taldyqorǵan men Tekeli arasyndaǵy 50 shaqyrymdyq shoıyn jolmen tek júk qana tasymaldanatyndyǵyn, osy jolmen jolaýshylar poıyzynyń qatynaýyna da múmkindik jasaý kerektigin atap ótken edi.
— Turǵyndardyń el Úkimetine joldap otyrǵan ótinishteriniń negizi — osy shoıyn joldy jolaýshylar úshin de tıimdi etip berý. Eki ara jaqyn bolǵanymen turǵyndar úshin óte qolaısyz ári qorqynyshty bolyp ketkeli qashan?! Sebebi óńir taýly aımaqta ornalasqandyqtan, oblys ortalyǵy men Almatyǵa qatynaıtyn avtokólikteri jıi jol apatyna ushyraıdy. Adam shyǵyny da az emes. Tipti, oqys jaǵdaı kóktem men kúzde, ásirese qystyń kúnderi jıi oryn alatyn bolǵan, — dedi Májilis depýtattary.
Osy saýalǵa jaýap bergen Kólik mınıstriniń mindetin atqarýshy Maqsat Qalıaqparov atalǵan aralyqta temirjol jelisi júk tasymaly úshin qoldanylatyndyǵyn aıtady. Alaıda, qazirgi ýaqytta jolaýshylar poıyzdaryn júrgizý úshin ınfraqurylym men tehnologııalyq jabdyqtalýy tıisti talaptarǵa tolyq sáıkes kelmeıdi.
— Buǵan qosa, jolaýshylar aǵyny men ekonomıkalyq oryndylyǵy turǵysynan júrgizilgen taldaý nátıjeleri negizinde bul baǵytta turaqty jolaýshylar poıyzyn iske qosý ázirge josparlanbaǵan. Sonymen qatar, Tekeli men Taldyqorǵan qalalary arasyndaǵy araqashyqtyqtyń jaqyndyǵyn eskere otyryp, bul baǵytta jaqsy jaǵdaıdaǵy avtojoldar arqyly jolaýshylardyń qatynaýy qamtamasyz etilip jatyr. Jýyrda qaıta jańǵyrtýdan ótken respýblıkalyq mańyzdaǵy joldar kólik qozǵalysy úshin qaýipsiz ári qolaıly jaǵdaı jasap otyr. Búginde óńirler arasynda kóliktik qoljetimdilikti arttyrý maqsatynda avto jáne temirjol ınfraqurylymdaryn kezeń-kezeńimen damytý jumystary júrgizilýde. Aldaǵy ýaqytta óńirdiń áleýmettik-ekonomıkalyq damý dınamıkasy men jolaýshylar aǵynynyń ózgerýine qaraı bul másele qosymsha qarastyrylatyn bolady, — dedi ol.
Budan buryn Taldyqorǵan-Úsharal gaz qubyry jelilik bóliginiń qurylysy aıaqtalǵanyn jazǵan edik.