Taldyqorǵan mańynda qum-qıyrshyqtas qospasyn zańsyz óndirý faktisi toqtatyldy
ASTANA. KAZINFORM — Jetisý oblysy polıtsııa departamentiniń tabıǵatty qorǵaý polıtsııasy qyzmetkerleri tabıǵatty qorǵaý prokýratýrasy, Taldyqorǵan polıtsııa basqarmasynyń patrýldik polıtsııa rotasy jáne ýchaskelik polıtsııa ınspektorlarymen birlesip Balyqty ózeniniń jaǵalaýynda reıdtik is-shara ótkizdi.
Polıtsııanyń málimetinshe, reıd barysynda polıtseıler qum-qıyrshyqtas qospasyn zańsyz óndirý jáne tıeý faktisin anyqtady. Oqıǵa ornynda tabıǵı materıaldy zańsyz tıeýge qoldanylǵan traktor men eki júk kóligi anyqtaldy.
Traktor arnaıy turaqqa qoıyldy. Bul fakt boıynsha qajetti materıaldar jınaqtalyp, qoldanystaǵy zańnamaǵa sáıkes qaraý jáne tıisti sharalar qabyldaý úshin Jetisý oblysy boıynsha ekologııa departamentine joldanady.
Vedomstvo bul baǵyttaǵy reıdtik jáne profılaktıkalyq is-sharalar aldaǵy ýaqytta da jalǵasatynyn málimdedi.
Eske salaıyq, buǵan deıin Astanada qurylys nysanynan topyraq urlamaq bolǵan tórt júrgizýshi ustalǵanyn habarlaǵan edik.
