Taldyqorǵan-Qalbataý-Óskemen avtojolyn qaıta jańartý jumystarynyń negizgi bóligi aıaqtaldy

«QazAvtoJol» ulttyq kompanııasy «Taldyqorǵan-Qalbataý-Óskemen» avtojolyn qaıta jańartý boıynsha (287-615 shaqyrym aralyǵynda) Jetisý oblysynda uzyndyǵy 314 shaqyrymdy quraıtyn negizgi jumystardy aıaqtady.

Qaıta jańartý barysynda avtojoldyń tehnıkalyq erekshelikteri jaqsartyldy: 32 shaqyrym І tehnıkalyq sanatqa, al 282 shaqyrym ІІ tehnıkalyq sanatqa aýystyryldy (joldyń eni 9 metrge uzartyldy).

Qazirgi tańda 314 shaqyrym aralyqta joldyń joǵary qabatyna qıyrshy tasty-mastıkalyq asfalt jabyny tóseldi.

«Qurylys barysynda 5 asfaltbeton zaýyty, 500-den asa jol-qurylys tehnıkasy men 700-ge jýyq jumysshy jumyldyryldy (onyń ishinde kóbisi jergilikti eldi mekenniń azamattary).

Jol paıdalanýshylarǵa qolaıly jaǵdaı jasaý maqsatynda 12 demalys alańy jáne 10 zamanaýı sanıtarlyq-gıgıenalyq torap soǵý josparlanǵan, onyń ishinde 4 sanıtarlyq-gıgıenalyq toraby qoldanysqa berildi», — delingen kompanııa habarlamasynda.

Avtojoldyń bul ýchaskesi arqyly endi Almaty qalasynan Alakólge deıin jyldam ári qolaıly jetýge múmkindik berip, elimizdegi ishki týrızmniń damýyna oń septigin tıgizetin bolady.

Aıta keteıik, «Taldyqorǵan-Qalbataý-Óskemen» avtojolynyń qaıta jańartý jumystarynyń uzyndyǵy 768 shaqyrymdy quraıdy. Bul joldyń58 shaqyrymy І-b sanatyna, al 710 shaqyrymy ІІ sanatqa jatady. Joba úsh oblysty qamtıdy: Jetisý, Abaı jáne Shyǵys Qazaqstan. Jobaaıasynda 81 kópir men jol ótkelderin, sondaı-aq 521 sý ótkizgish qubyrlaryn salý josparlanýda. Sonymen qatar joba aıasynda sanıtarlyq-gıgıenalyq qurylǵylary bar demalys oryndaryn soǵý qarastyrylǵan.

Nysandy qaıta jańartý jumystaryn 2024 jyldyń sońyna deıin aıaqtaý josparlanyp otyr.