Taldyqorǵan qalasynyń turǵyny kópqabatty úıdiń aýlasyn gúldengen baqqa aınaldyrǵan
TALDYQORǴAN. KAZINFORM – Jetisýlyq Olga Serebrennıkova úıdiń kireberis tusyna jyl saıyn san túrli gúl ósiredi. Sózinshe gúlderi qara sýyq túskenshe óńin bermeıdi. 11 jyl ishinde áýesqoı baǵban gúldiń júzdegen túrin ósirip keledi. Búginde aýlasynda 60-tan astam ósimdiktiń túri bar.
«Medıtsına salasynda jumys istedim. Zeınetkerlikke shyqqannan keıin bos ýaqytym kóbeıdi, sosyn gúl ósirýmen aınalysa bastadym. Ártúrli gúl ósiremin. Shyraıgúl, túımedaq, balshatyr, baqytgúl, astra, barqytgúl, qońyraýgúl jáne t.b. Al, bórtegúl kóktemde gúldeıdi. Jalpy gúldiń 60-tan astam túri bar. Ásirese tas raýshan – óte erekshe gúl. Úıimniń aýlasynan óz qolymmen gúlzar jasadym. Basqa da gúl ósirýshilermen aralasyp turamyn. Bir-birimizben tájirıbe almasamyz, bir-birimizge kóshet, tuqym beremiz. Biz oazıs jasap otyrmyz, sony kútemiz, sýaramyz. Ári ádemi, ári paıdaly. Kórshilerge de unaıdy, olar bizge qoldaý kórsetedi, birge qýanady, balalar da gúlge uqypty qaraıdy», - dedi Olga Serebrennıkova.
Oblys ortalyǵynyń taǵy bir turǵyny óz aýlasyn kógaldandyrýmen 15 jyldan beri aınalysyp keledi. Ol 50 sotyq jerge úlken gúlzar jasap, jemis aǵashtaryn ósirip otyr. Lázzat Asanova kóshesindegi № 69 kópqabatty úıdiń aýlasyn baqqa aınaldyrǵan Tatıana Ibragımovanyń sózinshe, ol gúldiń jańa sorttaryn otyrǵyzýdy josparlap otyr.
Jalpy, Taldyqorǵan qalasy ákimdiginiń málimetine qaraǵanda, bıyl oblys ortalyǵynda «Úlgili aýla» baıqaýy ótedi. Baıqaýdyń basty maqsaty – qalanyń keskin-kelbetin jaqsartý. Sondaı-aq aýla aýmaqtarynyń sanıtarlyq jaǵdaıy men kógaldandyrylýyn, abattandyrylýyn qolǵa alý.
