Taldyqorǵan qalasynyń qysqy maýsymǵa daıyndyǵy tekserildi
TALDYQORǴAN. KAZINFORM - Qala ákimi Ernat Bázil qalanyń qysqy maýsymǵa daıyndyq barysyn tekserdi. Jaýapty merdiger uıymdarǵa keı máselelerdi áli de pysyqtaý kerektigin eskertti.
Jetisý oblysynyń ortalyǵy Taldyqorǵan qalasynda jalpy uzyndyǵy 700 shaqyrymnan asatyn 644 kóshe bar. Bıyl jol qurylymy men jaıaý júrginshiler jolaǵyn qardan tazalaýmen «Taldyqorǵan Kórkeıtý» JShS, «ABS LDstroı» JShS, «Shyǵys-4» JShS men «ABZ Karer DRSÝ» JShS jáne aınalmaly joldarmen «QazAvtoJol» aınalysady. Qys aılarynda qala ishindegi jáne aınalma joldarǵa tóseýge 5360 tonna qum men 1600 tonnadan astam tuzdyń qory bar. 119 birlik tehnıka daıyndaldy.
«Búgin qalanyń qysqy maýsymǵa daıyndyq barysyn kórip, arnaıy tehnıkalardyń jaı-kúıin aralap óttim. Barlyq jaýapty merdiger mekemelerdiń ınertti materıaldar qory men tehnıkalary da jetkilikti. Aldaǵy qysqy maýsymǵa tolyqtaı daıynbyz», - dedi qala ákimi Ernat Bázil.
Taldyqorǵan qalasy ákimdiginiń baspasóz qyzmetiniń málimetinshe, bıyl zamanaýı úlgide jasaqtalǵan avto-shańsorǵysh, ekskavator tıegish jáne ámbebap jol mashınalary syndy 6 dana tehnıka satyp alynǵan.
Eske salaıyq buǵan deıin Jetisý oblysy joldarynyń qys mezgiline daıyndyǵyn jazǵanbyz.
