Taldyqorǵan qalasy jańa jyldyq bezendirýge 36 mln teńgege jýyq qarajat bólgen
TALDYQORǴAN. KAZINFORM — Jetisý oblysynyń ortalyǵy Taldyqorǵandy jańa jyldyq bezendirýge bıyl jergilikti bıýdjetten 35 960 341 teńge bólingen. Merekege daıyndyq jumystary 17- shi jeltoqsanda bastalyp, 23-ine deıin aıaqtalady dep josparlanyp otyr.
Jeltoqsan aıynyń orta sheninde elimizdegi óńirlerdiń bári jyldaǵy dástúrge saı jańa jyldyń qamyna kirisetini anyq. Ortalyq alańdarǵa shyrshalar ornatylyp, qala ishinde túrli- tústi shamdar jaǵylady. Sanaýly kúnder ǵana sán- saltanaty asyp turatyn bezendirýlerge bıýdjettiń búıirin solqyldatyp, mıllıondar jumsalady. Jetisý oblysynyń ortalyǵy Taldyqorǵan qalasyna bıyl jańa shyrshalar alynbaıdy. Esesine qoldanysta bar 3 shyrshaǵa ilinetin shamdar (kýpol) men barlyq bezendirý jumysyna 19 129 230 teńge bólingen.
— Jańa jyldyq jańa shaǵyn sáýlet nysandaryn jasatýǵa 12 124 000 teńge bólindi. Byltyrdan qalǵan 30 danasyn qalpyna keltirdik. Onyń somasy 4 707 111 teńgege shyqty. Bezendirý ortalyq alańnan bólek, «Jastar» saıabaǵy men «Bereke» kottedj qalashyǵyna, qala mańyndaǵy Ótenaı men Erkin aýyldyq okrýgterine de júrgiziledi, — dedi Taldyqorǵan qalalyq ákimdiginiń baspasóz qyzmeti.
Aıta keteıik 2022 jyly qala ákimidigi quny 3 mlnnan asatyn 3 shyrsha (9 871 000 teńge) satyp alǵanyn málimdegen bolatyn. Sol jyly jańa jyldyq bezendirýge 36,5 mln teńge bólingen edi. Qala turǵyndarynyń keıbiri mundaı sharalarǵa jyl saıyn aqsha jumsaǵansha qalanyń kem- ketigin toltyrsa degendi aıtady.
— Menińshe mılııondardy shyrsha men shamdarǵa jumsaǵansha qaladaǵy kóp máselerdi sheship, solarǵa berse. Kópqabatty úıde turamyz. Úıimiz sýyq. Taldyqorǵanda qoqys máselesi ózekti. Qala mańynda múlde jaryq joq kósheler bar. Solardy jaǵyp bersin. Shyrsha kóp bolsa 10-15 kún ǵana turady. Al, máselemiz jyldar boıy sheshilmeıdi, -deıdi qala turǵyny Baljan Baıtoqova.
Eske salaıyq osyǵan deıin Aqtóbede Jańa jyl merekesine oraı qalany bezendirýge qarjy bólinbeıtinin jazǵanbyz.