Taldyqorǵan qalasy boıynsha 200 azamat merzimdi áskerı qyzmetke shaqyrylady

TALDYQORǴAN. KAZINFORM – 2025 jyldyń kúzgi shaqyrý naýqany aıasynda Taldyqorǵan qalasy boıynsha 200 azamatqa merzimdi áskerı qyzmetke shaqyrý jiberiledi. Bul týraly Óńirlik kommýnıkatsııalar qyzmeti alańynda ótken baspasóz máslıhatynda qalalyq Qorǵanys isteri jónindegi basqarmanyń bastyǵy Maqsat Dúısebekov málimdedi. 

Onyń aıtýynsha, áskerge shaqyrylýshylardy habardar etý kúntizbelik shaqyrý qaǵazdary nemese SMS habarlamalar arqyly júzege asyrylady.

– Habarlama alǵan soń azamattar Qorǵanys isteri jónindegi basqarmaǵa kelip, medıtsınalyq komıssııadan ótýi tıis. Komıssııa olardyń áskerı qyzmetke jaramdylyq dárejesin anyqtaıdy, - dedi Maqsat Qýandyquly.

Sonymen qatar vedomstvo ókili merzimdi áskerı qyzmetshiler úshin zańnamada birqatar jeńildik qarastyrylǵanyn aıtty.

Atap aıtqanda:

• Qyzmet etý kezeńinde jáne zapasqa shyqqannan keıin 60 kúnge deıin nesıe tóleý merzimin shegerý (kredıttik demalys);

• Ulttyq biryńǵaı testileýsiz (UBT) joǵary oqý oryndaryna aqyly nemese tegin negizde túsý múmkindigi beriledi.

Sonymen birge, merzimdi áskerı qyzmetten jaltarǵany úshin qoldanystaǵy zańnamada ákimshilik jáne qylmystyq jaýapkershilik kózdelgen.

Baspasóz máslıhaty barysynda qoıylǵan suraqtarǵa jaýap bergen basqarma basshysy shetelde bilim alyp júrgen jastarǵa qatysty máselege de toqtaldy.

– Qazirgi tańda qala boıynsha shetelde oqıtyn jastardyń kóbi eGov portaly arqyly resmı túrde áskerden keıinge qaldyrý rásimdemegen. Bizdiń málimetter bazasy Bilim jáne ǵylym mınıstrligimen ıntegratsııalanǵan. Eger azamat elimizdegi oqý ornynda oqysa, oǵan avtomatty túrde keıinge qaldyrý beriledi. Al shetelde oqyp júrgender eGov portaly arqyly arnaıy ótinish berip, notarıaldy kýálandyrylǵan jáne aýdarylǵan oqý ornynan anyqtamany usynýy qajet, - dedi Maqsat Dúısebekov. 

Buǵan deıin, Túrkistan oblysynan 2 500-ge jýyq azamat kúzgi áskerge attanatynyn jazǵanbyz.