Taldykóldiń mańyna qurylys júrgizýdiń shekti aýmaǵy belgilendi
ASTANA. KAZINFORM — Astana aýmaǵyndaǵy ózen-kólderdiń aınalasy endi zańmen qorǵalady. Esilden bastap Taldykólge deıingi sý aıdyndary úshin arnaıy qorǵaý aımaqtary men beldeýler belgilenip, ol jerlerde qurylys pen sharýashylyq jumystarǵa qatań shekteýler qoıylmaqshy.
Kópshilik talqylaýyna shyǵarylǵan Astana qalasy ákimi Qaýlysynyń jobasyna berilgen qujatty qabyldaý mynandaı maqsattarǵa qurylǵany aıtylǵan:
Astana qalasynyń ákimshilik shekaralaryndaǵy kelesi sý aıdyndarynda sý qorǵaý aımaqtary men beldeýlerin belgileý:
1) Esil ózeni (jańa arnasy), Esil ózeni (Golf-klýb mańyndaǵy starıtsasy), Qarasý ózeni, Nura-Esil kanaly, Maıbalyq kóli, Úlken Taldykól kóli úshin sý qorǵaý aımaqtarynyń eń az eni — 500 metr jáne sý qorǵaý beldeýleriniń eń az eni — 35 metr;
2) Aqbulaq jáne Sarybulaq bulaqtary úshin sý qorǵaý aımaqtarynyń eń az eni — 300 metr jáne sý qorǵaý beldeýleriniń eń az eni — 20 metr;
3) Ólmes kóli, Býzyqty kóli, Kishi Taldykól kóliniń № 7 ýchaskesi úshin sý qorǵaý aımaqtarynyń eń az eni — 300 metr jáne sý qorǵaý beldeýleriniń eń az eni — 35 metr.
Osylaısha Astana aýmaǵyndaǵy ózen-kólderdi qorǵaý úshin olardyń aınalasynda arnaıy qorǵanysh aımaqtar belgilenip otyr. Bul qalanyń aýmaǵyna kiretin naqty qaı sý aıdynyna qansha metr jerdi qorǵaý aımaǵy etip belgileý kerektigi anyq jazylyp otyr degen sóz. Osy belgilengen sheńberlerde qurylys júrgizýge, qoqys tastaýǵa, hımıkat qoldanýǵa jáne taǵy basqa sharýashylyq áreketter shekteý qoıylady.
Buǵan deıin Astana ákimdigi Taldykól mańynda beton zaýyty salynyp jatyr degen aqparatty teristegen bolatyn.