Taldykól, Greenline, Myńjyldyq – Astananyń qaı aýmaqtarynda jańa saıabaq ashylady

ASTANA. KAZINFORM – Astananyń Qorshaǵan ortany qorǵaý jáne tabıǵatty paıdalaný basqarmasynyń basshysy Dáýlet Dosqulov elordanyń qaı aýmaqtarynda jańa saıabaqtar men skverler salynatynyn aıtyp berdi.

Onyń aıtýynsha, Astanada bir Botanıkalyq baq, 14 park, 8 býlvar jáne 127 skver jumys isteıdi. Byltyr 2025 jyly elordada qoǵamdyq keńistikterdi abattandyrý jáne kógaldandyrý boıynsha 8 joba iske asyrylǵan. Atap aıtqanda, Máńgilik El dańǵylyndaǵy ýchaske men Prezıdent parki, Esil ózeniniń jaǵalaýy rekonstrýktsııalanǵan, Syǵanaq kóshesiniń boıy abattandyrylǵan, Greenline alleıasynyń birinshi kezegi salynǵan.

– Bıyl basqarma 10 qoǵamdyq keńistikti abattandyrýdy josparlap otyr. Olardyń ishinde Myńjyldyq alleıasynyń birinshi kezeńiniń qurylysyn bastaý, Q.Qýanyshbaev teatrynyń artynda skver, temirjol vokzaly mańynda skver salý bar. Sondaı-aq Greenline býlvarynyń ekinshi kezeńiniń qurylysy bastalady. Bul Omarov kóshesinen Kúltegin kóshesine deıingi jáne Ánet baba kóshesinen Tóle bı kóshesine deıingi ıgerilmegen aýmaqtardy qamtıdy. Jalpy osy aýdan boıynsha búkil úlken alleıany tolyq aıaqtaý josparlanǵan, – dedi basqarma basshysy elorda máslıhatynda qurylys máseleleri jónindegi turaqty komıssııanyń otyrysynda.

Taǵy bir mańyzdy joba — Taldykóldiń besinshi ýchaskesindegi Ekosaıabaqtyń qurylysyn bastaý. Oǵan qosa, Trıatlon parki men Beıbitshilik pen kelisim parkiniń rekonstrýktsııasy da qarastyrylǵan.

Sh.Qaldaıaqov kóshesin Táýelsizdik dańǵylynan Nurly jol temirjol vokzalyna deıin kógaldandyrý jumystary da júrgiziledi. Sońǵy joba — Qabanbaı batyr dańǵylynda LRT jelisi boıymen velojol men trotýar salý. Atalǵan joldar stelladan Syǵanaq kóshesine deıin jalǵaspaq.

Buǵan deıin Astana ákimi Jeńis Qasymbek Kishi Taldykóldegi ekopark qurylysynyń ne sebepti bıylǵy kóktemde bastalmaǵanyn túsindirgen edi.