«Taldaýy joq, túıtkili kóp baıandama» - BAQ-qa sholý
***
Keshe Bishkekte Shanhaı yntymaqtastyq uıymynyń kezekti sammıti ótti. Oǵan Qazaqstan Prezıdenti Nursultan Nazarbaev qatysyp, Elbasynyń sapary men ekijaqty kezdesýlerin sheteldik BAQ ókilderi barynsha yqylasty nasıhattady. Al bıyl birqatar aıtýly sharalardy atqarǵan qyrǵyz elinde qabyldanǵan Bishkek deklaratsııasy qandaı máselede bolsyn ShYU-ǵa múshe memleketterdiń mámilesi bir ekendigin is júzinde pash etti. Bul jaıynda «Egemen Qazaqstan» gazetiniń senbilik nómirindegi «Óńirlik qaýipsizdik ózegi» degen taqyryptaǵy maqalada baıan etilgen. «Sammıttiń reglamenti boıynsha tóraǵalyq etýshi eldiń basshysy A.Atambaev alǵashqy sózdi Qazaqstan Respýblıkasynyń Prezıdentine berdi. Al Keńestiń shaǵyn quramda ótken otyrysy barysynda Nursultan Nazarbaev Uıym boıynsha áriptesterge ShYU-nyń 2025 jylǵa deıingi Damý strategııasyn ázirleý ıdeıasyn qoldaǵandary úshin rızashylyq bildirdi. Ol atalǵan qujattyń negizin ShYU forýmy men taraptardyń jetekshi sarapshylaryn tarta otyryp daıyndaý qajettigin, Uıym qyzmetiniń negizgi baǵyttarynyń teńdestirilgen qaǵıdattary oryn alýy tıis ekenin atap ótti. Qazaqstan Prezıdenti ShYU Bas hatshysynyń rólin jáne Uıym Hatshylyǵy qyzmetiniń tıimdiligin arttyrý qajettigin kóldeneń tartty», - dep jazady basylym.
«Egemen Qazaqstan» gazetiniń jazýyna qaraǵanda, álemniń 17 myń ýnıversıtetteriniń arasynan úzdik ýnıversıtetterdi anyqtaıtyn QS World University Rankings agenttiginiń 2013/2014 jylǵy reıtınginde qazaqstandyq joǵary oqý oryndarynyń kóshbasshysy L.N.Gýmılev atyndaǵy Eýrazııa ulttyq ýnıversıteti 66 satyǵa kóterilip 303-oryndy ıelendi. Bul joǵary oqý orny baıqaýǵa 2009 jyldan bastap qatysyp keledi. Sodan beri ýnıversıtet eki jyl qatarynan álemniń eń úzdik joǵary oqý oryndarynyń arasynan kórinýde. Qazaqstannyń jetekshi joǵary oqý oryndarynyń biri L.N.Gýmılev atyndaǵy Eýrazııa ulttyq ýnıversıteti bilim berý sapasyn qamtamasyz etý jónindegi Táýelsiz qazaqstandyq agenttiginiń (IQAA-NKAOKO) ulttyq reıtıngine sáıkes 1-oryndy eki jyl qatarynan ıelendi. Ǵylymı-zertteý ınstıtýttaryn, ǵylymı ortalyqtar men zerthanalardy, biliktilikti jetildirý ınstıtýttary men túrli memleketterdiń mádenı bilim berý ortalyqtaryn qamtyǵan oqý orny Prezıdenttiń «Altyn sapa» syılyǵyn «Qyzmet kórsetetin úzdik kásiporyn» atalymy boıynsha alǵan bolatyn.
***
«Aýyl sharýashylyǵy mınıstrliginiń keńeıtilgen alqa otyrysynda mal azyǵyn óndirý máselesi boıynsha baıandama jasaǵan vıtse-mınıstr Gúlmıra Isaeva mınıstr Asylbek Mamytbekovten sóz estidi», - dep jazady «Aıqyn» gazeti senbilik sanynda jaryq kórgen «Taldaýy joq, túıtkili kóp baıandama» degen taqyryptaǵy maqalasynda. Basylymnyń jazýynsha, A.Mamytbekov orynbasarynyń baıandamasynda azyqtyq daqyldar máselesine tereń taldaý jasalmaǵanyna qynjylyp: «Baıandama faktilerdi atap ótý men statıstıkalardy tizip shyǵýǵa baǵyttalǵan. Problemany tereń taldaý joq. Eń bastysy, ne isteý kerek, problemany qalaı sheshý qajet, ne qoldaný kerek degen jaıttar kóterilmegen»,- depti.
Osy basylymnyń jazýynsha, dásúrli dindi jamaǵatqa nasıhattaýdyń jańa túri elimiz boıynsha Atyraýdan bastaý alatyn boldy. Jergilikti jerdegi jamaǵattar aımaqtaǵy barlyq meshitter janynda ornalasqan arnaıy teleekran arqyly respýblıka men oblysqa tanymal dinı saýatty teologtardyń ýaǵyzdaryn tyńdaýǵa múmkindik alady. «Sońǵy jyldary Atyraýdaǵy jastardyń ózge dinniń jeteginde ketip, qaýip tóńdiretin oqıǵasy jıi oryn aldy. Ózderin jarylǵysh qurylǵymen jaryp jiberip, aınalasyna orasan zor qaıǵy ákelgen oqıǵalardan soń, jergilikti ákimdik pen dinı basqarma basshylary jastardy ózge dinı aǵymdardan qorǵaýdy qolǵa alýda tolymdy jumystar uıymdastyryp keledi. Bizdiń paıymdaýymyzsha, elimiz boıynsha alǵashqy ret bastamasy jasalǵaly otyrǵan ýaǵyzdardy skaıp arqyly taratý jobasy óziniń oń nátıjesin beredi», - dep jazady basylym. Maqala «Dástúrli dindi ýaǵyzdaıtyn bastama» degen taqyryppen berilgen.
