Taldaýshylar bıtkoınniń odan ári tómendeýin boljady
ASTANA. KAZINFORM – Ótken aptadan beri bıtkoın baǵasy 82 myń dollardan 75 myń dollarǵa deıin tómendedi jáne birqatar sebepterge baılanysty taǵy tómendeýi múmkin, dep habarlaıdy Crypto News.
CryptoPotato habarlaýynsha, Tramp otbasyna tıesili Trump Media Group-pen baılanysty ámııandardyń biri bırjalarǵa 200 mln dollardan astam somaǵa krıptovalıýta jibergen, bul satý nıetimen bolýy múmkin.
Amerıkalyq kásipker, venchýrlyq kapıtalıst jáne mıllıarder Mark Kýbannyń málimdeýinshe, fıat valıýtalarynyń álsireýi men geosaıası turaqsyzdyqtan qorǵaný quraly retindegi róline senimin joǵaltqannan keıin óziniń $BTC-niń kóp bóligin satyp jibergenin.
Treıder Alı Martınes $BTC-tiń basqa ınvestorlary bırjalarǵa monetalardy jappaı jiberip jatqanyn atap ótti.
- Sońǵy bes kúnde bırjalarǵa quny 744 mln dollardan asatyn 9 664 bıtkoın jiberildi, - dep jazdy ol H-te.
Investorlardyń kóbi qarajatty bırjalarǵa tek olardy satý úshin aýdaratyny atap ótildi.
Osyǵan deıin blokcheın-taldaýmen aınalysatyn Arkham kompanııasy ırlandııalyq esirtki saýdageri, Dýblın qalasynyń týmasy Klıfton Kollınzǵa tıesili 500 bıtkoınniń ($BTC) shamamen on jyl boıy qozǵalyssyz jatqannan keıin qaıta aýdarylǵanyn habarlady.
