Taldaýdyń azdyǵynan BAQ lańkesterge eriksiz qoldaý jasap otyr - N.Ermekbaev
Bul týraly búgin Astanada ótip jatqan Eýrazııalyq medıaforýmda QR Qaýipsizdik keńesiniń hatshysy Nurlan Ermekbaev málim etti.
«Búginde BAQ azdap rettelmegen quqyqtyq alańda jumys isteýde. Halyqaralyq qaýymdastyq lańkestik pen dinı ekstremızmge áli kúnge deıin ortaq anyqtama bere almaı keledi. Osydan baryp bul máselege baılanysty kóptegen saýaldar shyǵady, máselen, biz kóp jyldardan beri lańkestik uıymdardyń biryńǵaı tizimin jasaı almaı kelemiz», - dep atap ótti ol. - Sondyqtan jýrnalıster lańkestik uıymdar men aktiler týraly jazarda kóptegen qıyndyqtarǵa tap bolyp jatady, sebebi olar qaı elde kimdi lańkestik uıym, kimdi dinı ekstremıst dep ataıtyndyǵyn bilmeıdi. Biz munda psıhologııalyq aspektiniń jetispeýshiligin baıqaımyz, BAQ tarapynan taldaýdyń azdyǵyn kóremiz».
N.Ermekbaev osyǵan baılanysty bir zertteýdiń nátıjelerin jarııa etti. Onda lańkesterdiń basty maqsaty ózin-ózi jarııa etý, memlekettik bıliktiń jáne halyqtyń arasynda úreı týǵyzý ekeni anyqtalǵan.
«Telearnalardan terakt jasaǵan adam týraly, onyń ómiri men osy áreketke qalaı barǵandyǵyn jarysa kórsetken kezde, bul tek lańkesterdiń paıdasyna jumys isteıdi jáne jastardyń osy áreketke kóptep barýyna ıtermeleıdi. Sonymen qatar keıbir reportajdarda biz quqyq qorǵaý organdarynyń jumys ádistemeleri men tásilderi týraly egjeı-tegjeıli kórsetiledi. Bir jaǵynan biz lańkesterge oqý quralyn berip jatsaq, ekinshi jaǵynan - óz taktıkalarymyzdy ashyp kórsetemiz. Osynyń barlyǵy lańkestikpen kúres isine keri áserin beredi», - dep atap ótti N.Ermekbaev.
Onyń oıynsha, BAQ-tyń barlyq áleýetin lańkesterdiń psıhologııasyn kórsetýge qoldaný kerek.
«Eger lańkestik bandylardyń ishinde ne bolyp jatqandyǵyn egjeı-tegjeıli kórsetetin bolsaq, jastar arasynda ıllıýzııalar az bolar edi», - dedi ol.