Taldaý: Qazaqstannyń polımer óndirisi ulttyq ekonomıkaǵa yqpal etýde
ASTANA. KAZINFORM - Qazaqstandaǵy polımer óndirisiniń damýy el ekonomıkasyna jáne aımaqtaǵy naryqtarǵa oń áserin tıgizýde. Jergilikti óndiristik qýattardy arttyrý strategııasy tıimdiligin kórsetip, ishki naryqtaǵy polımer ónimderiniń baǵasyna eleýli ózgerister ákeldi. Bul, ásirese, Market Report jáne ICIS derekteri boıynsha TMD elderindegi polımer baǵasynyń monıtorıngi barysynda anyq baıqalady.
2022 jyly QazMunaıGaz ben SIBÝR kompanııalarynyń seriktestigi negizinde iske qosylǵan KPI zaýyty Qazaqstandaǵy gomopolımer polıpropıleniniń baǵasyna aıtarlyqtaı oń áser etti. 2022-2024 jyldar aralyǵynda polımer shıkizatynyń baǵasy 30%-dan astamǵa tómendep, ımport kólemi aıtarlyqtaı qysqardy. Bul ishki naryqta óndiristi damytyp, ımport almastyrýda eleýli jetistikterge qol jetkizilgenin kórsetedi.
Qazirgi ýaqytta Qazaqstan aımaqtaǵy eń básekege qabiletti baǵalardy usynýda. Bul jergilikti óndiristiń damýy jáne SIBÝR-men seriktestiktiń arqasynda qol jetkizildi. Zamanaýı tehnologııalardy paıdalaný men ozyq basqarý tájirıbeleri Qazaqstannyń óńdeý ónerkásibinde jańa deńgeıge shyǵýyna múmkindik berdi.
Básekege qabiletti baǵa saıasaty men sapaly shıkizattyń qoljetimdiligi el ekonomıkasyna oń yqpalyn tıgizýde. Polımerdi qaıta óńdeýmen aınalysatyn kásiporyndar ózderiniń óndiristik shyǵyndaryn azaıtyp, odan ári damýǵa múmkindik aldy. Sonymen qatar, qolaıly naryqtyq jaǵdaılar qaıta óńdeý salasyna jańa ınvestıtsııalar tartýǵa jáne qosymsha óndiristik qýattar men jumys oryndarynyń qurylýyna jol ashýda.
Aldaǵy ýaqytta jańa seriktestik jobalar men halyqaralyq yntymaqtastyq Qazaqstannyń polımer salasyn odan ári damytýǵa serpin beredi. Bul jobalar eldiń ekonomıkasyna uzaq merzimdi oń áserin tıgizip, óńdeý ónerkásibindegi kóshbasshylyq pozıtsııasyn nyǵaıta túsedi.
