Talasbek Ásemqulovtyń «Taltús» romany túrik tilinde jaryq kórdi
ASTANA. KAZINFORM — Qazaq mádenıetiniń birtýar tulǵasy, teńdesi joq óner qaıratkeri, qalamger-oıshyl Talasbek Ásemqulovtyń shyǵarmasy túrik oqyrmandarmen tabysty, dep habarlaıdy TRT aqparattyq agenttigi.
Ankaradaǵy Adnan Ótúken atyndaǵy kitaphanada Qazaqstannyń kórnekti jazýshylarynyń biri, dombyra sheberi jáne mýzykatanýshy Talasbek Ásemqulovtyń ómirbaıandyq «Taltús» romanynyń tusaýkeseri ótti. Sharany «Kóktý» qazaq mádenıeti qoǵamy uıymdastyrdy.
Roman qazaq halqynyń rýhyn, tarıhyn, mýzykasyn baıandaýymen erekshelenedi.
Kitapty jazýshynyń serigi, ári mádenıet tanýshy, ǵalym, jazýshy Zıra Naýryzbaı tanystyrdy.
Sharada Talasbek Ásemqulovtyń tek jazýshy ǵana emes, jan-jaqty zııaly, kúıshi, dombyra sheberi, kompozıtor, kınodramatýrg, synshy, ónertanýshy, zertteýshi, kásibı aýdarmashy ekeni basa aıtyldy.
Al kitapty túrik tiline aýdarǵan Torǵyn Sezgın hanym óz sózinde aýdarma barysyndaǵy shyǵarmashylyq izdenisteri jaıly aıtyp, romandy «túrki halyqtarynyń ortaq rýhanı kody men kúı dástúrin biriktiretin mádenı kópir» dep baǵalady.
— Sheberdiń kózi tirisinde jaryq kórgen jalǵyz romany «Taltús» qazaq halqynyń rýhyn, tarıhyn, mýzykasyn tereń sezimtaldyqpen jetkizedi. Onda Talasbek Ásemqulov kúıdi — Jaratqannyń úni sanalatyn kıeli mýzykany baıandaý tiline aınaldyrady. Roman jeke adamnyń oqıǵasy ǵana emes; sonymen birge ótken ǵasyrdyń aýyrtpalyǵyn, halyqtyń kúnkóris kúresin, dombyranyń qazaq tarıhyndaǵy kıeli orny men mándi mańyzyn baıandaıtyn mádenı epos, — dedi romannyń aýdarmashysy sóz kezeginde.
Tusaýkeserge túriktiń mádenıet, óner jáne medıa ókilderi, túrli birlestikter men ádebıet súıer qaýym, sonymen birge qazaqstandyq jastar qatysty.
Eske sala keteıik, buǵan deıin Astanada «Ult aspaptar álemine saıahat» atty tanymdyq lektsııa-kontsert ótkeni týraly jazǵan edik.