Talasbek Ásemqulov baıqaýy: Almatyda kúıshiler baq synady
ALMATY. KAZINFORM — Almatyda jazýshy, kúıshi Talasbek Ásemqulov atyndaǵy kúıshiler men qalamgerler baıqaýy ótti.
Uıymdastyrýshylar aıtýynsha, Talasbektaný ádebı qalamgerler baıqaýy osymen 6 ret, kúıshiler baıqaýy 5 ret uıymdastyryldy. Buǵan deıin 4 ret kúıshiler saıysy elordada ótse, bıyl alǵash ret ulttyq aspap sheberleri Almatyda jınaldy.
Baıqaýda ádilqazylar alqasynyń tóraǵasy bolǵan Murat Ábýzǵazy Talasbek Ásemqulovtyń kúı ónerine qosqan úlesi orasan zor ekenin atap ótti.
— Baıqaýdyń basty maqsaty — Talasbek Ásemqulovtyń kúıshilik oryndaýshylyq ónerin dáripteý. Ol kisi kúı ónerine óte kóp eńbek sińirdi. Ásirese, Abylaıhannyń zamandasy bolǵan Baıjigit kúıshiniń murasyn tikeleı bizdiń zamanǵa tabystaǵan Talasbek aǵamyz. Shubartaý, Aıagóz óńirindegi barlyq kúıshilerge jolyǵyp, Baıjigittiń kúılerin úırengen. Odan keıin Talasbek aǵamyz 1975 jyly «Melodııa» fırmasynan Baıjigit kúıleriniń kúıtabaǵyn shyǵardy. Sondaı-aq attary belgisiz Saqbeke, Nurǵyz, Qyzylmoıynqýandyq, óziniń atasy Júnisbaıdyń kúılerin jetkizdi. Keıingi kezde óz janynan da kúıler shyǵardy, — dedi ol.
Baıqaýdyń negizgi talaptarynyń biri — Talasbek Ásemqulovtyń mánerine jaqyndatyp kúı tartý boldy. Jalpy saıysqa 14 jastaǵy baladan talaı jarystarda top jaryp júrgen dúldúlderge deıin 13 kúıshi qatysty. Nátıjesinde bas júlde Jarqynnur Erjanatqa buıyrdy. Ekinshi — Nuralı Saıatuly, úshinshi — Máýlet Aǵanas boldy. Talasbek Ásemqulovtyń atasy Júnisbaı Stambaev atyndaǵy arnaıy júlde Arman Janybekovke berildi. Al Ásemqulovtar otbasynyń atynan arnaıy júldeni Baımuhat Saǵı aldy.
Eske salaıyq, jazýshy, kınodramatýrg, kúıshi Talasbek Ásemqulov 1955 jyly 1 tamyzda Semeı oblysy Aıakóz aýdany Aqtoǵaı temirjol stansasynda dúnıege kelgen. 1976-1980 jyldary Almaty qalasy, Abaı atyndaǵy pedagogıka ınstıtýty fılologııa fakýltetinde bilim alǵan.
Respýblıkalyq baspasózde «Ataıy», «Kári at», «Arylý» sııaqty áńgimeleri, «Shymdan» povesi jáne mýzykanttardyń ómirine arnalǵan «Taltús» romany jaryq kórgen.«Máńgilik sary» antologııasyna 20-dan astam, «Qazaqtyń myń kúıi» (2009) antologııasyna 40-tan astam kúıi engen. 2010 jyly Parıjden «Táttimbettiń murasy» atty SD-dıski shyqqan.
Talasbek Ásemqulov 2014 jyly dúnıeden ótti.