Talas ózeninen zańsyz balyq aýlaǵan 22 brakoner jaýapqa tartylýda
TARAZ. QazAqparat - Aǵymdaǵy jyldyń bes aıynda zańsyz nemese tyıym salynǵan jerlerde balyq aýlaýmen, balyq jáne balyq ónimderin zańsyz satý jáne tasymaldaýmen baılanysty 28 quqyq buzýshylyq deregin anyqtalǵan,- dep habarlaıdy QazAqparat.
Jambyldyq polıtseıler balyq jáne basqa da sý jándikterin aýlaýdy shekteý boıynsha júıeli jumystar júrgizýde. Jumystar nátıjesi týraly oblystyq polıtsııa departamentiniń baspasóz qyzmeti habarlady.
«Tyıym salynǵanyna qaramastan, Talas ózeninde júıeli reıdtik is-sharalar barysynda 22 quqyq buzýshy ustalyp, olarǵa qatysty QR ÁQBtK-niń 383-baby 1-bóligimen ákimshilik quqyq buzýshylyq týraly hattama toltyrylyp, jalpy somasy 404 000 teńge aıyppul salyndy», - deıdi Polıtsııa departamenti baspasóz qyzmetiniń jetekshisi Gúlsara Muhtarqulova.
Sondaı-aq, atalǵan kezeńde Taraz qalasynyń saýda oryndarynda zańsyz balyq satý men tasymaldaýdyń jolyn kesý boıynsha birqatar reıdtik is-sharalar ótkizilgen.
«Zańsyz balyq tasymaldaýmen jáne satýmen aınalysatyn 6 adam anyqtalyp, olarǵa qatysty QR ÁQBtK-niń 389-baby 1-bóligimen ákimshilik is qozǵaldy. Olardan 194 keli balyq tárkilendi, is sotqa qaraý úshin jiberildi»,-deıdi G. Muhtarqulova.
