Talas aýdanynda jylý baǵasy 5,7 paıyzǵa arzandady
Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıteti Jambyl oblysy boıynsha departamentiniń basshysy Erbolat Dúısenbaev pen osy departamenttiń birqatar bólim basshylary Qarataý qalasynda bolyp, qala boıynsha jylý energııasy, ystyq jáne sýyq sýmen, sondaı-aq káriz júıesimen qamtamasyz etip otyrǵan «Igilik» kópsalaly kásipornynda boldy.
Memleket basshysynyń 2018 jylǵy 5 qazandaǵy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda aıtylǵan mindetterdi iske asyrý jónindegi jalpyulttyq is-sharalar josparyna sáıkes tarıfterdiń negizsiz ósýine jol bermeýge, tabıǵı monopolııalar men turǵyn úı-kommýnaldyq sharýashylyq sýbektileriniń tutynýshylar qarajatyn paıdalanýyn baqylaý men onyń ashyqtyǵyn qamtamasyz etýge baǵyttalǵan jedel sharalar keshenin qabyldaý boıynsha 5 tarmaqty jáne osy jylǵy 7 qarashada Qaýipsizdik keńesinde Elbasy bergen tapsyrmalardy iske asyrý maqsatynda arnaıy kelgen departament ókilderin «Igilik» kásipornynyń dırektory Rashıd Mádibekuly Seıdalıev qarsy alyp, mekeme jumysymen tanystyrdy.
«1976 jyldan beri jumys istep jatqan 2 bý jáne 2 sý ysytý qazandyǵy tutynýshylar suranysyn qamtamasyz etip keledi. Qarataý qalasy boıynsha 138 kópqabatty jáne 23 jeke turǵyn úıge kommýnaldyq qyzmet kórsetedi. Qalany aýyz sýmen «Tamdy» jáne «Kóktal» toǵandary qamtamasyz etip otyr», - deıdi Rashıd Mádibekuly.
Onyń aıtýynsha, «Tamdy» sý toǵanynyń ónimdiligi - sekýndyna 216 lıtr, al «Kóktaldyń» ónimdiligi - sekýndyna 190 lıtr.
«Oblys ákiminiń birinshi orynbasary Bekbolat Orynbekovtyń hattamalyq tapsyrmasynyń 7- tarmaǵynyń 3-tarmaqshasyn oryndaý maqsatynda kásiporynnyń jylý energııasy tarıfterine otyn shyǵynyn kezeń-kezeńimen engizý, jylý energııasyn óndirý, berý, bólý jáne tarıfterdiń shekti deńgeıin, sondaı-aq tarıftik smetalardy tótenshe retteýshi shara retinde qaraý úshin oblystyq Tabıǵı monopolııalardy retteý jáne básekelestikti qorǵaý departamentine usyný jumystaryn bastaýdy tapsyrǵan. Osyny basshylyqqa ala otyryp, atalmysh departamentke tarıftik smetalardy tótenshe retteýshi shara retinde otyn shyǵynyn kezeń-kezeńimen 30 paıyzdyq shyǵyn etip engizilý usynyldy. Osy departamenttiń buıryǵymen tarıfterdiń shekti deńgeıi bekitildi. Biz qazirgi tańda tarıfti 5,7 paıyzǵa tómendettik. Taǵy bir aıta ketetin jaıt, 2018 jyldyń 1-toqsanyna bıýdjet qarajaty esebinen otyn shyǵynyna 65 mln teńge sýbsıdııa bólinip, ol tolyqtaı ıgerildi», - dedi ol.
Budan ári oblystyq departament ókilderi sý jáne jylý berý jáne qazandyq jumystaryn kórip, Rashıd Seıdalıev jumys barysymen tolyqtaı tanystyryp otyrdy.
