Talapkerlerge UBT ýaqytyn eske salatyn SMS-habarlama joldanady

ASTANA. KAZINFORM – UBT-ǵa tirkelgen talapkerler testileýdiń kúni, ýaqyty men ornyn eske salatyn SMS-habarlamalar alatyn bolady.

UBT-ǵa tirkelgen árbir talapkerge app.testcenter.kz resmı saıtyna tirkelý kezinde kórsetilgen telefon nómirine SMS-habarlama jiberiledi. Sondaı-aq mundaı habarlamalar kámeletke tolmaǵan testilenýshilerdiń ata-analaryna nemese zańdy ókilderine de joldanady.

«UBT tapsyrýshylar testileý ótkiziletin kúndi, ýaqytty jáne oryndy umytyp ketýi nemese shatastyryp alýy múmkin. Ásirese, tirkelý barysynda birneshe ret ózgertý engizetin talapkerler arasynda osyndaı jaǵdaılar kezdesedi. Bul rette testileýge qatysý úshin ótinish bergen kezde talapkerler ózderi úshin qolaıly test ótkizý parametrlerin tańdaýǵa múmkindigi bar ekenin atap ótken jón. Birde-bir talapker mańyzdy emtıhandy jiberip almaýy úshin Ulttyq testileý ortalyǵy UBT ótkiziletin kúnnen bir kún buryn árbir testilenýshiniń nómirine SMS-habarlama jiberedi», — dedi QR ǴJBM Ulttyq testileý ortalyǵynyń dırektory Rýslan Emelbaev. 

Eske salatyn SMS-habarlama qyzmeti testileý protsesiniń barlyq qatysýshysy úshin barynsha aıqyndyq pen yńǵaılylyqty qamtamasyz etýge baǵyttalǵan.

Esterińizge sala keteıik, testileý týraly málimettermen talapkerler UTO saıtyndaǵy Jeke kabınette nemese UTO qosymshasy arqyly tanysa alady.