Talapkerlerdiń 74%-y testileýdi qazaq tilinde tapsyrǵan

ASTANA. KAZINFORM — UBT bastalǵannan beri 164 myńnan astam testileý ótkizildi. Talapkerlerdiń 74%-y testileýdi qazaq tilinde, 26%-y orys tilinde jáne 136 adam aǵylshyn tilinde tapsyrǵan. Bul týraly Ǵylym jáne joǵary bilim mınıstrligi málim etti.  

Vedomstvonyń málimetinshe, úshinshi aptanyń qorytyndysyna saı talapkerlerdiń 69%-y shekti ball jınaǵan. Bes pán boıynsha ortasha ball 65-ti qurady. Eń joǵary nátıje — 140 ball — Túrkistan oblysynan Ábilhan Jánibek birinshi aptada kórsetti.

— Qazirgi tańda testke qatysýshylardyń basym bóligi, atap aıtqanda, 18%-y «Matematıka-Fızıka», 15%-y «Bıologııa-Hımııa» pánder kombınatsııasyn tapsyrdy. 14%-y «Shyǵarmashylyq emtıhan» kombınatsııasyn tańdaǵan. Erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda UBT-ǵa 477 talapker qatysqan, — delingen habarlamada.

Talapkerlerdiń test tapsyrmalarynyń mazmuny boıynsha testileý aıaqtalǵannan keıin 30 mınýt ishinde apellıatsııaǵa berý quqyǵy bar. Tehnıkalyq sebepter boıynsha apellıatsııa tikeleı testileý kezinde qabyldanady. Nátıjeleri bar sertıfıkattar apellıatsııa qarastyrylǵannan keıin jeke kabınetterde qoljetimdi bolady.

— UBT bastalǵaly 206 ereje buzǵan jaǵdaı tirkelgen. 98 talapker smartfondardy, shpargalkalardy jáne basqa da tyıym salynǵan zattardy alyp kirmek bolǵany úshin testileýden shettetildi. Taǵy 108 adam testileý kezinde erejelerdi buzǵany úshin aýdıtorııadan shyǵaryldy, olardyń nátıjeleri joıyldy. Ózge adamdardyń ornyna kirý faktileri anyqtalǵan joq, — dep habarlady mınıstrlikten.

2025 jylǵy UBT aıaqtalǵannan keıin 31 qazanǵa deıin beınejazbalarǵa taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda UBT nátıjeleri joıylady.

Jalpy testileýge qatysýǵa 216 myń talapkerden 399 myńǵa jýyq ótinish kelip túsken.

Eske sala keteıik, buǵan deıin JOO-ǵa qujat qashan qabyldanatyny týraly jazǵan edik.