Talapkerlerdiń 63 paıyzy keshendi testileýden óte almady
ASTANA. 24 shilde. QazAqparat - 2013 jylǵy shildeniń 19-y men 22-i aralyǵynda ótken keshendi testileýden talapkerlerdiń 63,5 paıyzy óte almady. Bul týraly Ulttyq testileý ortalyǵynan habarlandy.
Eske salsaq, keshendi testileý ótken jyldardaǵy jalpy orta bilim berý uıymdarynyń bitirýshileri, tehnıkalyq jáne kásiptik (bastaýysh jáne orta kásiptik, orta bilimnen keıingi) bilim berý uıymdarynyń bitirýshileri, UBT-ǵa qatyspaǵan, halyqaralyq oqýshylarmen almasý jelisi boıynsha shetelde oqyǵan jalpy bilim beretin mektep bitirýshileri, orys nemese qazaq tilderinde oqytpaıtyn jalpy bilim berý uıymdarynyń bitirýshileri, respýblıkalyq mýzyka mektep-ınternattarynyń bitirýshileri, sondaı-aq oqý ornyn shetelde bitirgen tulǵalar úshin ótkizilgen bolatyn. Synaq 35 test ótkizý pýnktiniń (bazalyq joǵary oqý oryndary) bazasynda júzege asty.
Ulttyq testileý ortalyǵynyń málimetterine qaraǵanda, testileýge berilgen ótinish sany 78793 bolsa, onyń ishinde mektep bitirýshiler - 17769, jalpy orta bilimnen keıin (11-synyp) tehnıkalyq nemese kásiptik bilim uıymdaryn bitirýshiler - 17576, jalpy orta bilimnen keıin (9-synyp) tehnıkalyq nemese kásiptik bilim uıymdaryn bitirýshiler - 43448 adamdy quraǵan. «Synaqqa 76 655 talapker qatysty, onyń ishinde qazaq tilinde - 49 838, orys tilinde 26 817 talapker boldy. Nátıje boıynsha 48680 talapker nemese qatysýshylardyń 63,5 paıyzy shekti deńgeıden óte almady. Testileýge qatysýshylardyń 27 myń 975-i nemese 36,5 paıyzy mejelik shekten ótti. Byltyr keshendi testileýge 65439 talapker qatysyp, onyń 22763-i (34,8%) mejelik deńgeıden ótip, 42676-y (65,2%) óte almaǵan bolatyn», - delingen baspasóz baıanynda.
Synaq barysynda tártip saqtaý erejesin buzǵandary jáne aýdıtorııada tyıym salynǵan zattardy paıdalanǵany úshin 89 talapker shyǵarylyp, nátıjeleri joıylǵan.
