Talapkerler UBT kezinde beıindi pánderdi aýystyra almaıdy

NUR-SULTAN. QazAqparat – Ulttyq biryńǵaı testileýdiń birinshi múmkindiginde ereje buzǵan talapker ekinshisine jiberilmeıdi. Bul týraly QR BǴM Joǵary jáne joǵary oqý ornynan keıingi bilim departamenti dırektory Ádilet Toıbaev aıtty, dep habarlaıdy QazAqparat tilshisi.

«Bıyl Ulttyq biryńǵaı test tapsyrýǵa eki ret múmkindik berildi. Biraq, osy eki múmkindikte talapkerler beıindi pánderdi aýystyra almaıdy. Eger, birinshi múmkindikte «matematıka+fızıka» tapsyrsa, demek, ekinshi múmkindiginde de týra osy «matematıka+fızıka» pánderin tapsyrýǵa mindetti. Osy jylǵy UBT-nyń taǵy bir ereksheligi - birinshi múmkindikte ereje buzǵan jaǵdaıda nátıjeleri joıylady jáne ekinshi ret tapsyrýǵa jol berilmeıdi. Al eger talapker birinshi múmkindiginde sátti ótip, ekinshi múmkindiginde belgili bir erejeni buzsa, onda eki múmkindiginiń de nátıjesi joıylady ári granttyq konkrýsqa qatysa almaıdy. Sondyqtan árbir talapkerdi akaedmııalyq adaldyq ustanýǵa shaqyramyz», - dedi departament dırektory Ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, bıyl tek quqyq baǵyty boıynsha ǵana shekti ball 70-ke kóterilip otyr.

«Erekshe bilim berý qajettilikteri bar balalarǵa qosymsha 40 mınýt beriledi. Sonymen qatar olarǵa arnalǵan testerdiń sapasy da, qurylymy da ózgerdi. Taǵy bir jańashyldyq akademııalyq adaldyqty saqtaý maqsatynda testilenýshilerdiń test nusqasy tańbalanatyn bolady. Demek, árbir test tapsyrýshynyń jeke test nusqasy bolady jáne tańbalanady. Aqparattyq qaýipsizdik maqsatynda testileý «1 kompıýter – 2 kamera – 1 testilenýshi» qaǵıdaty boıynsha júrgiziledi», - dedi Ádilet Toıbaev.