Talapkerler oqýǵa qujatty qaı platformada onlaın tapsyra alady

ASTANA. QazAqparat – Ǵylym jáne joǵary bilim vıtse-mınıstri Qýanysh Erǵalıev talapkerler oqýǵa qujatty platforma arqyly onlaın tapsyrýǵa bolatynyn aıtty, dep habarlaıdy QazAqparat tilshisi.

«Shalǵaı aımaqtarda turatyn talapkerlerdiń yńǵaıy úshin eGov elektrondy úkimet portaly arqyly onlaın ótinish qabyldaý júrgiziledi. Sonymen qatar qujatyn dástúrli formatta – oflaın tapsyrǵysy keletinder úshin joǵary oqý oryndarynyń qabyldaý komıssııalary jumys isteıdi», - dedi ol.

Qýanysh Erǵalıev grantqa ótinish berý úshin oqý orny ornalasqan qalaǵa kelmese de bolatynyn aıtty.

«Osy jerde myna mańyzdy nárseni aıta ketsem, qujattardy kez kelgen JOO arqyly tapsyrýǵa bolady. Mysaly, Almatyǵa oqýǵa túsýdi josparlap otyrǵan túlek grantqa ótinish berý úshin Almatyǵa kelmeı-aq, qujattaryn eGov arqyly onlaın nemese jergilikti JOO arqyly oflaın tapsyra alady», - dedi vıtse-mınıstr.