Talapqa saı kelmeıtin jıhaz alǵan mektep basshylaryna aıyppul salyndy
ALMATY. QazAqparat – Almatyda mektep basshylyqtaryna talapqa saı jıhazdy almaǵany úshin 1,7 mln teńge kóleminde aıyppul salyndy, dep habarlaıdy QazAqparat tilshisi.
Mektepterge jetkiziletin jıhazdardyń sapasyn tekserýdi Taýarlar men qyzmetterdiń qaýipsizdigi men sapasyn baqylaý departamenti men Qalalyq kásipkerler palatasy mamandary birikken komıssııa ótkizdi.
Nátıjesinde birqatar oqý oryndarynda jıhazdardyń sapasy tómen ekendigi anyqtaldy.
«Taýarlar men qyzmetterdiń qaýipsizdigi men sapasyn baqylaý departamenti №17, 7, 49 mektepterdi teksergen bolatyn. Tekserý barysynda zerthanalyq baqylaý da qoldanyldy. Zertteý nátıjesinde zııandy hımııalyq bólshekter tabylmaǵanmen, jıhazdardyń kópshiligi tehnıkalyq reglamentke saı rásimdelmegen, memlekettik tilde aqparat joq, EAS belgisi kórsetilmegen. Partalarda oqýshylardyń ortasha boı ólshemi, oryndyqtarda fýnktsıonaldy ólshemi kórsetilmegen. Mektep jıhazdary oqýshylardyń boıy men jasyna sáıkes alynýy tıis. Bul jıhazdardy jetkizý kezinde arnaıy kelisimshart jasalǵan», - dedi departament basshysy Aızat Moldaqasymova.
Tekserý qorytyndysyna sáıkes mektep basshylaryna 1,7 mln teńge kóleminde aıyppul salyndy.
