Talap aryz qanaǵattandyryldy: Petropavlda alty otbasy «Dárigerler úıin» bosatýy tıis

PETROPAVL. KAZINFORM — Petropavldaǵy «Dárigerler úıinen» 6 medıtsına qyzmetkeri shyǵarylmaq: jaýapty basqarmanyń ustanymy qandaı? 

Petropavlda bir jyldan artyq «Dárigerler úıine» qatysty daý basylmaı keledi. Byltyr birneshe dáriger qyzmettik páterdi bosatý jóninde eskertý aldy.

Jekeshelendirip alýdy oılap júrgen mamandarǵa bul kútpegen jaıt boldy. Jaqynda sot Soltústik Qazaqstan oblystyq densaýlyq saqtaý basqarmasynyń talap aryzyn qanaǵattandyrdy, endi dárigerler bul páterlerdi bostaýlary tıis.

Basqarmanyń málimetinshe, «Dárigerler úıi» ýaqytsha baspana, ıaǵnı áleýmettik qoldaý retinde ǵana beriledi. Alaıda keı medıtsınalyq qyzmetkerler onda on jyldan artyq turǵan.

— Turǵyn úıdi ýaqytsha paıdalaný týraly kelisimsharttyń merzimi aıaqtalýyna baılanysty, dárigerlerge páterlerdi bosatý týraly eskertý berilgen. Alaıda turǵyndar óz erkimen kóshýden bas tartty. Osyǵan baılanysty, basqarma jas mamandar men oblysqa jańadan kelgen dárigerlerge páterlerdi berý qajettigin eskere otyryp, olardy shyǵarýǵa qatysty talap aryzdy sotqa joldady.

Jaqynda bul másele sotta qaraldy. Taraptardyń ýájderin tyńdaǵan sot, dárigerlerdi shyǵarý týraly talap aryzdy qanaǵattandyrdy. Sheshim zańdy kúshine 30 kúntizbelik kún ótken soń enedi. Bul aralyqta jaýapkerlerdiń apellıatsııalyq shaǵym túsirýge quqyǵy bar, — deıdi SQO densaýlyq saqtaý basqarmasynyń basshysy Sáken Ámrın.

Bastapqyda, basqarmanyń talaptaryna sáıkes, «Dárigerler úıinen» 9 medıtsına qyzmetkerin shyǵarý kózdelgen. Alaıda, sot protsesi kezinde olardyń úsheýi óz erkimen baspanany bosatqan.

— «Dárigerler úıinde» 5 jyl ýaqytsha turýǵa bolady. Bul — jas mamandarǵa áleýmettik kómek kórsetý tetigi. Osy ýaqyt ishinde dárigerler jeke turǵyn úıge qarajat jınaqtaýy tıis. Birneshe qyzmetkerge ǵana baspanany turaqty túrde turýǵa berý — teń qoljetimdilikti shekteıdi.

Bul — oblysqa kelgen barlyq jas dáriger úshin teń múmkindik jasaý maqsatynda qabyldanǵan sheshim. Páterler tek ýaqytsha áleýmettik kómek retinde beriledi. Basqa jaǵdaıda — qoldaýdyń ashyq ári ádil bolý mehanızmin buzamyz, — dedi Sáken Ámrın.

Buǵan deıin medıtsına qyzmetkerlerine qandaı qoldaý kórsetilip otyrǵanyn jazǵan edik.