Talantty oqýshylardyń «ІІ Naýryz kezdesýleri» ótti
ASTANA. 16 naýryz. QazAqparat - Búgin Astanadaǵy «Nazarbaev» Zııatkerlik mektebinde pán olımpıadalary men ǵylymı baıqaýlar jeńimpazdarynyń, talantty oqýshylardyń qatysýymen «ІІ Naýryz kezdesýleri» ótti.
Eske salsaq, atalmysh sharanyń maqsaty - oqýshylardyń bıologııa men hımııa pánderinen bilimderin tereńdetý jáne keńeıtý, olardyń zertteýshilik daǵdylaryn damytý, ǵylymǵa tartý.
Eki kúnge ulasatyn baǵdarlama barysynda qazaqstandyq jáne sheteldik ǵalymdar 9-10 synyp oqýshylaryna ǵylymı-tanymdyq dárister oqyp, olardyń zertteýshilik daǵdylaryn jetildirý maqsatynda hımııa, bıologııa pánderi muǵalimderine sheberlik sabaqtaryn ótkizedi. Sonymen qatar, «ІІ Naýryz kezdesýleri» baǵdarlamasy boıynsha mektep oqýshylary Ulttyq ǵylymı ana men bala ortalyǵynda, Respýblıkalyq neırohırýrgııa ǵylymı ortalyǵynda, Bıotehnologııa ulttyq ortalyǵynda, «QazMunaıÓnimderi» AQ-nyń synaq zerthanasynda, Sanıtarlyq-epıdemıologııalyq saraptaý ortalyǵynda, Dári- dármek quraldary men medıtsınalyq taǵaıyndaýlardy, tehnıkalardy saraptama jasaý ulttyq ortalyǵynda, «Qazaqstandyq metrologııa ınstıtýty» RMM-da bolyp, zerthanalyq jumystar júrgizetin bolady. Balalar tájirıbeler ótkizip, júrgizilgen tájirıbelerdiń barysyn baqylaı alady, sonymen qatar atalǵan ǵylym salasyn tereńirek zertteýge múmkindik alady.
Toqtala ketetin jaıt, Naýryz kezdesýlerin ótkizý dástúri 2011 jyldyń naýryzynda «Nazarbaev» Zııatkerlik mektebinde Qazaqstan Respýblıkasy Táýelsizdiginiń 20 jyldyǵyna oraı ótken is-sharadan bastalǵan bolatyn.
