Talantty óner ıesi, aıtys aqyny Kádirhan Qızatuly ómirden ozdy

ASTANA. KAZINFORM — Talantty óner ıesi, aıtys aqyny, kúıshi, pýblıtsıst, qazaq mádenıetimen ádebıetiniń, óneriniń janashyry Kádirhan Qızatuly dúnıeden ótti dep habarlaıdy Kazinform tilishisi.

Asyl azamat, mol qazyna, bolmysy da óz dene tulǵasyndaı kesek, iri tulǵa Kádirhan Qızatuly jol-kólik oqıǵasynan O dúnıelik boldy.

Ol Qytaıdaǵy qazaq aıtysynyń iri ókili ǵana emes, zertteýshisi, joqtaýshysy edi. Kúıshi, shejireshi, sheshen edi. Kúlli áńgimesi aınalasyndaǵy talanttardyń ǵajap bolmysyna súıiný, solar týraly ershimdi estelikter edi.

Atap aıtar bolsaq, Jamalhan Qarabatyrqyzy, Berdihan Abaıuly, Jumaǵalı Quıqabaıuly, Qurmanbek Zeıtinǵazyuly jáne Zadahan Myńbaev syndy Qytaı qazaqtaryna belgili birtýar óner ıeleriniń artynda qalǵan mol murasyn elge jetkizý bolatyn.

Marqum Astananyń irgesindegi Qosshy qalasynyń turǵyny. Janaza namazy Qosshyda oqylady dep josparlanǵan.

QR avtorlar qoǵamynyń múshesi, aıtysker aqyn, etnograf, qıssager, ánshi jáne kúıshi qazaq óneriniń shyn janashyry Kádirhan Qızatulyn qysqasha tanystyra keteıik.

Kádirhan Qızatuly 1963 jyly QHR Tarbaǵataı aımaǵy Dórbiljin aýdanynyń Sary Emil fırmasynyń Maıly taýynda malshy otbasynda dúnıege kelgen.

1980-1995 jyldar aralyǵynda bastaýysh jáne ortalaý mektepterde ádebıetten sabaq bergen.

1995-2014 jyldary Dórbiljin aýdandyq mádenıet úıiniń dırektory bolyp jumys atqarǵan. 2014 jyly demalysqa shyqqan.

1980 jyldan bastap qazirge deıin úsh júzden astam óleń tolǵaýlar men onnan astam poema jazǵan. «Qarymjy», «Qaıran, Dáýren» qatarly kóptgen aıtys jáne jyr, proza jınaqtarynyń avtory.

1986-2006 jyldary «Tanymal aıtysker», «Ólke dárejeli aıtysker», «Tarbaǵataı aımaǵyna eńbegi sińgen aıtysker» ataqtaryn alǵan. Sonymen birge dáýlesker kúıshi. Repertýarynda óz avtorlyǵyndaǵy jáne kóptegen halyq kúıleri bar.

2016 jyly tarıhı otanyna qonys aýdaryp kelgennen beri «Myń bulaq» jyr jınaǵy men «Qytaı qazaq aqyndar aıtysy», «Atam aıtqan áńgimeler» atty kitaptar qurastyryp oqyrmanǵa usyndy.

QHR memlekettik aýyz ádebıet qoǵamynyń, ShUAR ádebıet kórkemóner qoǵamynyń, Іle qazaq avtonomııaly oblystyq aıtys zertteý qoǵamynyń múshesi. QR avtorlar qoǵamynyń múshesi. Jaqynda QR jazýshylar odaǵyna qabyldanǵan edi.