Talant eń kishkentaı aýylda da dúnıege kelýi múmkin — Islam Baıramýkov
ASTANA. KAZINFORM — Talantty balanyń qaı jerde dúnıege kelgeni mańyzdy emes, oǵan óz qabiletin damytýǵa múmkindik berilýi kerek. Qazaqstan Halyq Keńesiniń birinshi sessııasynda belgili sportshy Islam Baıramýkov óńirlerdegi balalarǵa teń múmkindik jasaý máselesine erekshe nazar aýdardy.
Óz sózinde Islam Baıramýkov Halyq Keńesi eldiń barlyq óńirinen kelgen azamattardy biriktiretin biregeı alań ekenin atap ótti.
— Óńirlerdi damytý jáne balalarymyzǵa teń múmkindikter jasaý máselesi maǵan óte jaqyn. Sońǵy jyldary ádildik, barshaǵa teń múmkindik týraly kóp aıtylyp júr. Bul — Memleket basshysynyń basty ustanymy, — dedi sportshy Táýelsizdik saraıynda ótken Keńestiń birinshi sessııasynda.
Sportshynyń aıtýynsha, balanyń sportqa qabileti bolsa, ony damytýǵa jaǵdaı jasalýy kerek. Dál osyndaı múmkindik mýzykaǵa, ónerge, ǵylymǵa nemese tehnologııaǵa qyzyǵatyn balalarǵa da berilýge tıis.
— Aýyldaǵy balaǵa sportpen aınalysýǵa, mádenıet oshaqtaryna barýǵa, zamanaýı bilim berý resýrstaryna qol jetkizýge, túrli jarystar men baıqaýlarǵa qatysýǵa jáne óz bolashaǵyn qalyptastyrýǵa múmkindik beretindeı jan-jaqty jaǵdaı jasaýymyz kerek. Talanttyń eń kishkentaı aýyldyń ózinde dúnıege kelýi múmkin ekenin óz tájirıbemnen bilemin. Sol talantty kóre alamyz ba jáne onyń ashylýyna múmkindik bere alamyz ba — másele sonda, — dedi Islam Baıramýkov.
Sportshy óziniń týǵan jeri — Jambyl oblysynyń qazirgi Turar Rysqulov aýdanyn mysal etti. Bul óńirdiń sport tarıhy Lýgovoı jylqy zaýytymen de tyǵyz baılanysty.
— Kishkentaı ǵana aýdannan bizde 11 Olımpıada júldegeri bar eken. Onyń ishinde 3 altyn, 2 kúmis, 6 qola medal ıegeri bar. Álemge áıgili, kezinde búkil álemge shýly Lýgovoı jylqy zaýyty bolǵan. Sol jerden shyqqan ataqty sáıgúlik — «Absent». 1960 jyly Italııada, Rım qalasynda ótken Olımpıada oıyndarynda top jaryp, altyn medal utyp alǵan bolatyn. Odan keıin 1964 jyly Japonııada, Tokıo qalasynda ótken Olımpıada oıyndarynda eki medal ıegeri — eki qola, jáne 1968 jyly Meksıkada ótken Olımpıada oıyndarynda taǵy da qola medal alǵan, — dedi ol.
Osy turǵyda I. Baıramýkov Qazaqstan Halyq Keńesiniń róli mańyzdy ekenin aıtty.
— Biz óńirlerdiń damýy týraly naqty máselelerdi kóterýimiz qajet. Búgin teń múmkindikter jasaı otyryp, biz erteńgi Qazaqstannyń adamı kapıtalyn damytamyz, — dedi ol.
Buǵan deıin Memleket basshysy Qasym-Jomart Toqaev óskeleń urpaqtyń bos ýaqytyn tıimdi ótkizýine jaǵdaı jasap, kitaphana, mýzeı, mektep, saıabaq jáne basqa da qoǵamdyq nysandardy barynsha tıimdi paıdalaný keregin aıtqan edi.
Sonymen birge, Prezıdent abattandyrý isine jumsalǵan qarjy — halqymyzdyń bolashaǵyna jasalǵan ınvestıtsııa dep atady.
