«Talan» fılmi afrıkalyq kınofestıvalge qatysady
ALMATY. QazAqparat - Rejısser Bolat Qalymbetovtiń «Talan» kórkem fılmi Durban International Film Festival kınofestıvaliniń baǵdarlamasyna qatysatyn boldy, dep habarlaıdy QazAqparat tilshisi.
Óner festıvali 18-28 shilde aralyǵynda Ońtústik Afrıka Respýblıkasynyń Dýrban qalasynda ótedi.
Qazaqstan kınosynyń tarıhynda alǵash ret otandyq fılm OAR-da kórsetiledi. Bul festıvalge taǵy bir qazaqstandyq kıno - Abdel Fıftıbaevtyń «Boıjetken» fılmi qatysady. Bul kartına - «Qazaqfılm» AQ jobasy emes.
Ońtústik Afrıkadaǵy eń iri jáne kóne kınofestıval - Durban IFF bıyl kórermenderge álemniń túkpir-túkpirinen 180-nen astam fılm kórsetip, túrli semınarlar men «dóńgelek ústelder» uıymdastyrady.
«Talan» kartınasyn tanymal qazaqstandyq akter ári rejısser Bolat Qalymbetov túsirgen. Kıno asharshylyq pen qýǵyn-súrginniń zamanynda jetim qalǵan eki uldyń bastan keshkenderi týraly aıtady. Dostar birneshe jyldan keıin kútpegen sátte kezdesip qalady...
Esterińizge sala keteıik, byltyr «Talan» fılmi Sháken Aımanovtyń 14-shi halyqaralyq kınofestıvalinde úzdik rejıssýra úshin jeńimpaz atanǵan bolatyn. Sondaı-aq, bul festıvalde tarıhı kartına «El Arna» telearnasynyń «El Arna tańdaýy» dıplomyna ıe boldy. 
