Tal túbinen tabylǵan balanyń bas súıegine jarty jyldan soń taǵy ota jasalady
ALMATY. QazAqparat - Tal túbinen tabylǵan 4,5 jasar balanyń bas súıegi 3-6 aıdan soń jabylady, dep habarlaıdy QazAqparat tilshisi.
Dárigerlerdiń aıtýynsha, balaǵa 3-6 aı kóleminde qaıta ota jasalady. Hırýrgtar balanyń bas súıegin qalpyna keltiretin bolady.
«Alǵan jaraqaty óte aýyr bolǵandyqtan oǵan uzaq ýaqyt ońaltý sharalarynan ótý kerek. Bizdiń aýrýhanada emdeý hattamasy boıynsha mundaı patsıentter 14-21 kún em alady. Álbette, tolyǵymen jazylyp ketpeıdi. Bala em alǵan soń 2 apta-1 aıdaı demalyp, qaıta aýrýhanaǵa jatqyzylady, sóıtip reabılıtatsııalyq em alady. Qazir balanyń bas súıeginiń orny ashyq, tek terimen jabylyp tur. 3-6 aı aralyǵynda súıek qaıta ornyna salynyp, jabylýy kerek. Sonymen balanyń jaǵdaıy jaqsarýy tıis», - dedi Almatydaǵy balalar shuǵyl medıtsınalyq kómek kórsetý ortalyǵynyń bas dárigeri Abaı Qusaıynov.
Onyń aıtýynsha, qazir balanyń jaǵdaıy birqalypty.
«Bala anasymen birge. Esin biledi, suraqqa jaýap bere alady. Alǵan jaraqatyna baılanysty aıaq qol gemıparezi, sóıleýiniń buzylysy bar. Bala ózi tamaq ishedi. Ata-anasyn tanıdy», - dedi ortalyq neırohırýrgy Nıkolaı Dıachenko.
Mamandardyń aıtýynsha, balasy men anasy aýrýhanada tegin kepildendirilgen medıtsınalyq kómek esebinen emdelip jatyr.
«Mundaı jaraqat óte aýyr jaraqat túrine jatady. Únemi osyndaı asqynýlar bolyp turady. Bizdiń mindet - asqynýlardy barynsha azaıtý. Jaraqattan soń vegetatıvti, sóıleý, qozǵalys buzylystarynyń bolýy - qalypty jaǵdaı. Olardy boldyrmaýǵa barynsha tyrysamyz», - dedi Nıkolaı Dıachenko.
Balanyń neırohırýrgııalyq bólimshege aýystyrylǵanyn keshe habarlaǵan bolatynbyz.
Aıta ketý kerek, jantúrshigerlik oqıǵa Almatydaǵy shyǵys aınalma jolyna jaqyn Brıanskaıa kóshesinde bolǵan. 4 jasar balany kólik qaǵyp, qan-josa bolǵan kúıde kórpege orap, tal túbine qaldyryp ketken. Ata-anasy birneshe mınýt ótken soń ǵana balany júzdegen metr qashyqtyqtan taýyp alǵan.
