Tal túbinen tabylǵan 4 jasar búldirshin jasandy tynys alý apparatynan shyǵaryldy
ALMATY. QazAqparat - Tal túbinen tabylǵan 4 jasar búldirshinniń beti beri qarap, jaǵdaıy jaqsara bastady. Bala jasandy tynys alý apparatynan shyǵarylyp, ózdiginen demala bastady. Bul týraly QazAqparat tilshisine balanyń tátesi Rýfına Asqarogly aıtty.
Onyń aıtýynsha, qazir bala ózi tynys alyp jatyr.
«Balanyń jaǵdaıy jaqsaryp keledi. Dárigerler dınamıkasy óte jaqsy dep jatyr. Syrtqy faktorlarǵa reaktsııa bar. Qazir onyń qasynda anasy otyr. Basqa eshkimdi kirgizbeıdi. Bala esin jııa bastaǵanda, dárigerler jasandy komaǵa kirgizedi. Sebebi, oǵan qazir uıyqtaý kerek eken. Eń bastysy, balany jasandy tynys alý apparatynan ajyratty. Ol ózi demalyp jatyr», - dedi Rýfına Asqarogly.
Onyń aıtýynsha, qazir polıtsııa kóshedegi beınekameradan bir er adamdy baqylaýǵa alǵan.
«Kamerada er adam Brıanskaıa kóshesiniń boıymen qashyp bara jatyp, artyna, Muhamed jatqan taldarǵa qaraı beredi. Ol balany kamera joq jerde soqqan sııaqty. Sosyn, kóligin sol jerde qaldyryp, kameraǵa ilinbeı, balany taldyń túbine aparyp tastaǵan. Sosyn artyna qaraılap qashyp bara jatyp, kameranyń nazarynan shyǵyp ketedi. Qaı jerde kamera baryn bilgenine qaraǵanda, osy aýdannyń turǵyny sııaqty», - deıdi R.Asqarogly.
Onyń aıtýynsha, bala etpetinen jatqan. Asyǵys laqtyra salǵan sııaqty. Keıin ony adamdar taýyp alǵan soń ǵana shalqasynan aýdaryp, astyna kórpe tósegen.
«Biz oqıǵany kózben kórgenderdiń habarlasýyn ótinemiz. Sizdiń jeke málimetińiz qupııa saqtalady. Oǵan kepildik beremiz. Biz ol jerde bireýler bolǵanyna senimdimiz», - dedi ol.
Aıta ketý kerek, jantúrshigerlik oqıǵa Almatydaǵy shyǵys aınalma jolyna jaqyn Brıanskaıa kóshesinde bolǵan. 4 jasar balany kólik qaǵyp, qan josa bolǵan kúıde kórpege orap, tal túbine qaldyryp ketken. Ata-anasy birneshe mınýt ótken soń ǵana balany júzdegen metr qashyqtyqtan taýyp alǵan.
Al dárigerler búldirshinniń jaǵdaıyn óte aýyr dep baǵalaǵan bolatyn. Medıtsına mamandary balanyń ómirin arashalap qalý úshin baryn saldy.
