Tal túbinen tabylǵan 4 jasar bala jansaqtaý bóliminen shyqty
ALMATY. QazAqparat - Almatyda dárigerler tal túbinen aýyr bas jaraqatymen tabylǵan 4 jasar balanyń jaǵdaıy týraly aıtyp berdi, dep habarlaıdy QazAqparat tilshisi.
Dárigerlerdiń aıtýynsha, bala neırohırýrgııalyq palataǵa aýystyryldy.
«Balanyń jaǵdaıy birqalypty aýyr. Qazir anasynyń qasynda, sóıleıdi, tamaq ishedi. Biraq, óte álsiz. Balanyń oń jaq aıaq qolynyń gemıparezi baıqalady, ıaǵnı bulshyq eti álsiregen», - dedi Balalarǵa arnalǵan Shuǵyl medıtsınalyq ortalyǵy bas dárigeriniń orynbasary Dinmuhammed Rýzýddınov.
Onyń aıtýynsha, qazir bala neırohırýrgııalyq bólimshege aýystyryldy.
«Onyń qalpyna kelý ýaqyty týraly aıtýǵa áli erte. Qazir neırotroptyq, mı qan aınalymyn jaqsartatyn preparattardy, vıtamın terapııasyn qabyldap jatyr. Balany 2-3 aptada úıine shyǵaramyz degen úmittenemiz», - dedi dáriger.
Aıta ketý kerek, jantúrshigerlik oqıǵa Almatydaǵy shyǵys aınalma jolyna jaqyn Brıanskaıa kóshesinde bolǵan. 4 jastaǵy balany kólik qaǵyp, qan-josa bolǵan kúıde kórpege orap, tal túbine qaldyryp ketken. Ata-anasy birneshe mınýt ótken soń ǵana balany júzdegen metr qashyqtan taýyp alǵan.
Búldirshin keshe aýyr halden esin jıǵan bolatyn.
