«Talgonyń» bıletsiz jolaýshylary tehvagonda tasymaldanǵan
ASTANA. 21 qańtar. QazAqparat - «Almaty-Atyraý» baǵdary boıynsha júrgen №77 «Talgo» júrdek jolaýshylar poıyzynyń tekserisi nátıjesinde Kólikti baqylaý komıtetiniń aýmaqtyq organdarymen 15 bıletsiz jolaýshy tasymaldanǵany anyqtaldy.
QR KKM baspasóz qyzmetiniń málimetinshe, onyń ishinde poıyzdyń 4 bıletsiz jolaýshysy búkil poıyz quramyn elektr qýatymen qamsyzdandyratyn dızel qurylǵysy ornatylǵan tehnıkalyq vagonnyń ishinde tasymaldanǵan. «Bul jaǵdaıda negizgi jaýapkershilik jolaýshylardy qaýipti vagonda tasymaldaǵan tasymaldaýshynyń moınynda. Onyń ishinde eshqandaı jaǵdaı jasalmaǵan: tehvagonda sol vagonǵa qyzmet kórsetetin mehanıkke bir ǵana oryn jabdyqtalǵan», - dep túsindirdi QR KKM Temirjol kóligindegi baqylaý basqarmasynyń jetekshisi Berik Іstileev. Ol sonymen qatar jolaýshylardy tasymaldaý erejelerin buzǵan úshin «Jolaýshylar tasymaly» AQ tasymaldaýshysy qyzmetkerleriniń áreketine ákimshilik is qozǵalǵanyn habarlady. Tasymaldaýshylarmen temirjol kóligimen Jolaýshylardy, bagajdy jáne júkterdi tasymaldaý erejelerin ustaný boıynsha tekserisi jalǵasýda.
