«Talgodaǵy» zorlyq: QTJ májilismen Nurlan Áltaevtyń málimdemesine jaýap berdi
NUR-SULTAN. QazAqparat – «Qazaqstan temir joly» UK» AQ basshylyǵy Parlament Májilisiniń depýtaty Nurjan Áltaevtyń málimdemesine jaýap berdi, dep habarlaıdy QazAqparat tilshisi.
«Depýtattardyń usynysyna qatysty pikir bildirý quqyǵy bizde joq. Eger sot qaýlysy bolsa, álbette, kompanııa aryzǵa sáıkes talapty oryndaıdy. Bizdiń basshylyq buǵan qatysty buryn da tıisti jaýabyn bergen bolatyn», - dep habarlaıdy QTJ-nyń baspasóz qyzmeti.
Aıta keterligi, budan buryn Parlament Májilisiniń depýtaty Nurjan Áltaev «Talgo» poıyzyndaǵy zorlyqqa qatysty «Qazaqstan temir joly» kompanııasyn jaýapqa tartýǵa shaqyratynyn ýáde etken bolatyn.
«Men zardap shekken boıjetkenmen baılanysqa shyqtym. Sondaı-aq, «Qazaqstan temir joly» kompanııasyna qatysty azamattyq aryz berýde zańgerlik kómek berýdi usyndym. Eger boıjetken kelisse, biz oǵan úzdik advokattardy jaldaımyz. «Qazaqstan temir joly» bul qylmystyń zardap shegýshisiniń aldynda úlken, ásirese qarjylyq jaýapkershilikke ıe. Sondyqtan, barlyq, tipti moraldyq shyǵyndy da óterlikteı etemiz», - degen edi Nurjan Áltaev elordada ótken dóńgelek ústelde.
Eske salsaq, ǵylymı konferentsııadan qaıtyp kele jatqan boıjetkendi «Talgo» poıyzynda zorlady degen kúdik boıynsha eki jolserikke qatysty qylmystyq is sotqa túsken.
Keıin bul oqıǵa boıynsha «Jolaýshylar tasymaly» AQ túsinik berdi.
26 shilde kúni Qostanaıda «Tulpar-Talgo» poıyzynda aqtóbelik boıjetkendi zorlaǵan eki jolserikke úkim oqyldy.
