«Talgo» poıyzynyń jolserigine pyshaq salǵan er adam sottaldy
ATYRAÝ. QazAqparat - Atyraý oblysynda «Talgo» júrdek poıyzynyń jolserigin pyshaqpen jaraqattaǵan er adam 5 jylǵa sottaldy, dep habarlaıdy QazAqparat tilshisi.
«Atyraý oblysy Qyzylqoǵa aýdandyq sotynda «Talgo» poıyzynda jolserikti pyshaqpen jaraqattaǵan azamat J.T.-ǵa qatysty qylmystyq is qaraldy. Sot otyrysy barysynda anyqtalǵandaı, ishimdikke toıyp alǵan aıyptalýshy Atyraý oblysynyń Saǵyz stansasynda perronda turǵan «Talgo» jolaýshylar poıyzynyń jolserigine taıanyp, ony Qandaǵash stansasyna deıin ala ketýdi ótingen. Bıletsiz jolaýshyny alýdan bas tartqan jolserikti aıyptalýshy ıterip jiberip, vagonǵa kirýge tyrysqan. Osy sátte áriptesine kómekke ózge jolserik umtylǵan. Oǵan janjal shyǵarǵan er adam pyshaq jaraqatyn salǵan. Zardap shegýshiniń densaýlyǵyna asa aýyr zııan keltirildi», - dep málimdedi Atyraý oblystyq sotynyń baspasóz qyzmetinen.
Sot otyrysy barysynda sottalýshy istegen áreketine ókinip, kinásin moıyndady. Zardap shegýshiden keshirim alǵan ol, sottan qatań jaza taǵaıyndamaýdy surady.
«Sot úkimimen azamat J.T. Qazaqstan Respýblıkasynyń Qylmystyq kodeksiniń 106-baby 2-bóligi 7-tarmaǵy boıynsha kináli dep tanyldy. Іstiń barlyq mán-jaıy eskerile otyryp, sot oǵan 5 jylǵa shartty túrde bas bostandyǵynan aıyrý jazasyn taǵaıyndady», - dep habarlady oblystyq sottan.
Sot úkimi zańdy kúshine endi.
