Talgo poıyzynyń reısteri nege toqtatylady – mınıstr jaýaby

ASTANA. QazAqparat – Indýstrııa jáne ınfraqurylymdyq damý mınıstri Qaıyrbek Óskenbaev «Talgo» poıyzy reısteriniń toqtaýyna qatysty pikir bildirdi, dep habarlaıdy QazAqparat tilshisi.

«Atap aıtqanda, «Talgo» poıyzy bizdiń talap boıynsha qosymsha tehnıkalyq baıqaýdan ótýi kerek. Sonymen qatar, bul poıyzdyń jyldamdyǵy basqa deńgeıde bolǵandyqtan, egjeı-tegjeıli tekserýdi qajet etedi. Eger aýa raıyna baılanysty nemese keıbir tehnıkalyq kidiristerge baılanysty «Talgo» belgilengen ýaqyt aralyǵynda júrip úlgermeıtin bolsa jáne keshigip jatsa, onda jaǵdaı túzelgenshe tıisti sheshimder qabyldanady. Meniń oıymsha, bul másele birneshe kúnde sheshiledi. Sebebi, tehnıkalyq tekserý tez arada aıaqtalýy kerek. Eger bári durys bolsa, atalǵan poıyzdardyń qozǵalysy qalpyna keledi», - dedi Q. Óskenbaev Senattyń jalpy otyrysynan keıin tilshiler saýalyna jaýap bere otyryp.

Budan buryn habarlanǵandaı, Astana-Shymkent arasynda qatynaıtyn «Talgo» poıyzy bir kúnge toqtaıdy.

Sonymen qatar, Almaty-2 men Petropavl arasyndaǵy №105 «Talgo» jolaýshylar poıyzynyń qozǵalysy keıbir datalar boıynsha toqtaıtyn boldy.