«Talgo» buzylyp, 220 jolaýshy basqa poıyzǵa otyrýǵa májbúr boldy
«2018 jyldyń 4 qańtarynda «Astana-Lenınogorsk» baǵytynda qatynaıtyn №375 «Tulpar-Talgo» poıyzynyń tehnıkalyq vagonynan shyqqan aqaý saldarynan jolaýshylar vagondarynyń temperatýra rejiminiń tómendeýi oryn aldy. Atalǵan poıyzdyń 220 jolaýshysy Semeı stansasynda standartty vagondardan jasaqtalǵan ózge quramǵa otyrǵyzylyp, dittegen jerine jóneltildi», - delingen «Jolaýshylar tasymaly» AQ baspasóz qyzmeti taratqan aqparatta.
Taratylǵan málimetke qaraǵanda, jolaýshylar dittegen jerine jetkennen keıin jolaqy qunynyń aıyrmasy qaıtarylatyn bolady.
«Jolaýshylar tasymaly» AQ oryn alǵan qolaısyzdyqtar úshin keshirim suraıdy. Tehnıkalyq vagonnan aqaý shyǵý sebebin qyzmet kórsetýshi kompanııasynyń mamandary anyqtaıdy», - dep atap ótedi «Jolaýshylar tasymaly» AQ.
