Taqyrypty túsindirý 10 mınýttyq telesabaqpen shektelmeıdi - BǴM
NUR-SULTAN. QazAqparat – Taqyrypty túsindirý tek telesabaq kezindegi vıdeomen shektelmeıdi. Bul týraly búgin onlaın brıfıngide QR Bilim jáne ǵylym vıtse-mınıstri Sholpan Karınova málim etti, dep habarlaıdy QazAqparat tilshisi.
«Jalpy, bizdiń qoǵam mektepterde bir sabaqtyń 40 mınýtqa sozylǵanyna úırenip qalǵan. Sondyqtan «telesabaq nege 10 mınýt bolyp belgilendi» degen sýaldar oryndy. Bul 10 mınýttyq sabaqtardyń ishinde muǵalimniń jańa taqyrypty túsindirýi qamtylǵan. Atap aıtqanda, sabaq osymen aıaqtalmaıdy. 10 mınýttyq kórsetilimnen keıin, ár muǵalim óziniń synybyndaǵy balalarmen jekeleı jumys júrgizedi. Taqyrypty túsindirý tek telesabaq kezindegi vıdeomen shektelmeıdi», - dedi vıtse-mınıstr.
Osy oraıda ol oqýshynyń qolynda oqý quraldary men oqýlyǵy, ádistemelik nusqaýlyqtary bar ekenin eske saldy. Balalar oqýlyqtan tıisti materıaldardy paıdalanyp, taqyrypty ózdiginen ıgere alady.
«Teleformattan keıin ár muǵalim óziniń oqýshylaryna tapsyrmalar beredi. Teledıdardan sabaqty kórgennen keıin, oqýshy úshin taqyryp aıaqtalmaıdy. Oqýshylar tapsyrmany túsingendigi jaıynda, oryndaǵan tapsyrmalary boıynsha keri baılanys arqyly muǵalimin habardar etedi. Sáıkesinshe, 40 mınýtqa tatıtyn sabaq ótkizilgenmen teń bolady», - dedi Sholpan Karınova.
Sonymen qatar vıtse-mınıstr qashyqtan oqytý kezinde búgin tańerteń bastaýysh synyp oqýshylary bilim berý júıelerin belsendi paıdalanǵanyn aıtty. Budan buryn habarlanǵandaı, qashyqtan oqytý kezinde muǵalimderden esep berý talap etilmeıdi.
