«Taktıkalyq kelispeýshilikten» keıingi kezdesý: Tramp pen Netanıahý neni talqylady
ASTANA. KAZINFORM – Izraıl premer-mınıstri Bınıamın Netanıahý men AQSh prezıdenti Donald Tramp seısenbi kúni Vashıngtonda kelissóz ótkizip, Irannyń ıadrolyq qarýǵa ıe bolýyna jol bermeý jónindegi ustanymdaryn rastady. Bul týraly Euronews jazdy.
Izraıl delegatsııasyndaǵy joǵary laýazymdy derekkózdiń málimetinshe, kezdesý «óte oń» jaǵdaıda ótken.
– Premer-mınıstr men prezıdent kún tártibindegi negizgi máselelerdi, eń aldymen Iran taqyrybyn jan-jaqty talqylady, – dedi aty-jóni atalmaǵan derekkóz.
Kelissóz shamamen 90 mınýtqa sozyldy. Aq úı kezdesýdi «oń ári nátıjeli» dep baǵalady.
Taraptar AQSh pen Izraıldiń Iranǵa qarsy soǵysy dıplomatııalyq kúsh-jiger aıasynda ýaqytsha báseńdegen tusta qalyptasqan jaǵdaıdy talqylady.
Netanıahý Izraılden attanar aldynda Iran máselesine basymdyq beriletinin aıtyp, el qaýipsizdigin qamtamasyz etý jáne óńirdegi beıbitshilik aıasyn keńeıtý maqsatyn atap ótti.
Bul Tramptyń 2025 jyldyń basynda Aq úıge oralýynan keıingi eki kóshbasshynyń segizinshi kezdesýi boldy. Sonymen birge bul AQSh pen Izraıldiń Iranǵa qarsy keń aýqymdy soǵysy bastalǵaly beri olardyń alǵashqy jeke kelissózi.
Kezdesý Izraıldegi saılaý men osy jyly ótetin AQSh-taǵy aralyq saılaý qarsańynda ótti.
Vashıngtonǵa kelgennen keıin Netanıahý marqum senator Lındsı Gremdi eske alýǵa arnalǵan jabyq keshki asqa qatysty. Sondaı-aq ol qaraly rásimge qatysýy tıis boldy.
Kelissóz barysynda AQSh qoldaıtyn Izraıl men Lıvan arasyndaǵy kelisimdi júzege asyrý, sondaı-aq Gaza sektoryn qalpyna keltirý jónindegi baıaý júrip jatqan jumystar da sóz bolǵany habarlandy.
Izraıl men HAMAS arasyndaǵy soǵys bastalǵanyna úsh jylǵa jýyq ýaqyt ótse de, Gaza sektoryndaǵy gýmanıtarlyq ahýal áli de aýyr. Izraıl aımaqqa turaqty túrde soqqy jasap keledi.
Buǵan deıin Tramp pen Netanıahý arasyndaǵy qarym-qatynas Iranmen atysty toqtatý kelissózderi kezinde shıelenisken edi. Tramp Izraıl premer-mınıstrin ashyq synap, keıin ony «óte kúrdeli adam» dep ataǵan.
Netanıahý bul jaǵdaıdy «taktıkalyq kelispeýshilik» dep baǵalap, AQSh pen Izraıldiń Iranǵa qatysty túpki maqsattary ortaq ekenin málimdedi.
Aıta keteıik, buǵan deıin Izraıl Premer-mınıstri Vashıngtonda Tramppen negizinen Iran máselesin talqylaıtynyn málimdegenin jazdyq.
