«Taqtar oıynynyń» juldyzy Nıkolaı Koster-Valdaý ról tańdaýda qandaı ustanymǵa súıenetinin aıtty
ASTANA. KAZINFORM — «Taqtar oıyny» serıalyndaǵy Djeımı Lannıster róli arqyly tanylǵan danııalyq akter Nıkolaı Koster-Valdaý keıipker tańdaýda ózi úshin eń mańyzdy qaǵıdany atady.
Comic Con Astana 2026 aıasynda ótken baspasóz máslıhatynda akter ár usynylǵan rólge kelise bermeıtinin aıtty.
— Men somdaıtyn keıipkerdi túsine alýym kerek. Onyń áreketin quptamaýym múmkin, biraq ne úshin solaı istegenin uǵynǵym keledi. Alaıda eshqashan kelispeıtin rólder de bar. Mysaly, balalarǵa zorlyq-zombylyq kórsetetin adamdardyń beınesin somdaýdan bas tarttym, — dedi Nıkolaı Koster-Valdaý.
Akterdiń aıtýynsha, qazir ol stsenarıı men keıipkerden bólek, fılmniń kóteretin taqyrybyna da erekshe mán beredi.
— Men tek qyzyqty oqıǵany ǵana emes, belgili bir oıy, qoǵamǵa aıtar sózi bar jobalardy izdeımin. Jumysym oıyn-saýyqpen ǵana shektelmeı, adamdarǵa qandaı da bir paıdasyn tıgizse deımin. Onyń nátıjesin aldyn ala boljaý múmkin emes, biraq men úshin osy mańyzdy, — dedi ol.
Koster-Valdaý sondaı-aq jasy ulǵaıǵan saıyn ózine usynylatyn rólderdiń de ózgergenin aıtty.
— Buryn áke rólin alǵash ret somdaýǵa usynys alsam, qazir ata beıneleri de usynyla bastady. Men úshin mansaptyń eń bıik shyńy degen uǵym joq. Ár ról, ár jumys jańa tájirıbe beredi. Akterlik mamandyqty qyzyqty etetin de — osy, — ol.
Aıta keteıik, búgin elordada Comic Con Astana 2026 festıvali bastaldy.
Buǵan deıin Comic Con Astana 2026 festıvaliniń qonaǵy, danııalyq akter Nıkolaı Koster-Valdaý Qazaqstanǵa alǵashqy sapary jaıly áńgimelegen edi.
