«Taqtalas» serıalynyń juldyzy Pılý Asbek Qazaqstanǵa keledi
Esterińizde bolsa, ártis álemge áıgili «Taqtalas» (Game of Thrones) serıalynda Eýron Greıdjoıdyń rólin oınaıdy. Festıval qonaǵy elordadaǵy halyqaralyq komıks-konventte óz fanattaryna avtograf-sessııa ótkizedi dep kútilýde.
Iohan Fılıp «Pılý» Asbek - dat akteri. Túrmedegi tirshilik týraly baıandaıtyn «Sottalýshy R» dramasyndaǵy rólinen keıin tanymaldyqqa ıe bolǵan. Bul jumysy arqyly birden birneshe júldeni jeńip alǵanyn aıta ketý kerek. Atap aıtqanda, Dat kınoakademııasynyń «Robert» syılyǵyn, Danııa kınosynshylar qaýymdastyǵynyń «Bodıl» júldesin jáne ataqty Berlın kınofestıvaliniń «Aqqan juldyz» marapatyn ıelengen. Sonymen qatar, «Úkimet» saıası dramasynda ustanymyna adal emes polıttehnolog Kasper ıÝldyń rólin oınap, kórermenge keńinen tanyldy.
Degenmen, naǵyz álemdik ataq-dańq Asbekke «Taqtalas» serıaly arqyly keldi. Ol serıaldyń 6-maýsymynan bastap «Temir flottyń» kapıtany Eýron Greıdjoıdyń rólin somdap júr.
Odan bólek, ol eki fılmde álem juldyzy Skarlet Iohanssonmen birge oınaǵan - Lıýk Bessonnyń «Lıýsı» ekshny men Rýpert Sanderstyń «Saýyt kıgen eles» fantastıkalyq blokbasterinde. Sondaı-aq Tımýr Bekmambetovtyń «Ben-Gýr» fılminen de akterdiń ónerin tamashalaýǵa bolady.
Sonymen birge, Amerıka jáne Qytaı birlesip túsirgen asa qymbat kartınalardyń biri «Uly bekinis» jobasynda Mett Deımon jáne Pedro Paskalmen birge oınady.
Aldaǵy ýaqytta Pılý Asbekti tanymal juldyzdar Djekı Chan jáne Djon Sınmen birge «Iks jobasy» boevıginen kóre alamyz. Fılm taıaý arada jaryqqa shyǵady.
Eske sala keteıik, 31 mamyr men 2 maýsym aralyǵynda elordada Comic Con halyqaralyq festıval-kórmesi ótedi. Komıks jankúıerleri men kınosúıerlerdiń, beıne-oıyndar men mýltfılmge áýes jandardyń arasynda keńinen tanymal Comic Con festıvali óz bastaýyn AQSh-tan alady. Álemniń ár túkpirinde ótip turatyn bul festıval komıks avtorlary men jankúıerleriniń dástúrli basqosýyna aınalyp úlgergen.
