Taksıstke sengen elordalyq 40 myń dollarynan aıyrylyp qaldy
NUR-SULTAN. QazAqparat – Elordalyq áıel taksıshige senemin dep, 40 myń dollarynan aıyryldy, dep habarlaıdy QazAqparat tilshisi.
«Serikboldy Sársembınovqa alaıaqtyq jasady degen kúdikpen izdeý jarııalandy. Ol jeke taksı qyzmetinde júrip, jumys babynda bir áıelmen tanysqan. Áıeldiń baspanaǵa zárý ekenin bilgen ol kepildik múlikti usyna otyryp, nesıe alyp berýge ýáde bergen. Jábirlenýshiniń senimine kirgennen keıin onyń 40 myń dollaryn alyp, habarsyz ketken», - dep habarlaıdy elordanyń Polıtsııa departamentinen.
Osyǵan uqsas qylmys jasady degen kúdikpen Qorlan Satybaev esimdi jigitke de izdeý salynǵan. Ol qıyn jaǵdaıda qalǵan taǵy bir áıeldiń senimine kirip, 30 myń dollaryn qaltasyna basqan.
«Sol sekildi, qala aýmaǵynda jasyrynyp júrgen Rınat Silámov atty adamǵa izdeý jarııalanady. Er adam kezeksiz páter alyp beremin degen jeleýmen qala turǵyndaryn aldap kelgen. Osyndaı amalmen 10 adamnyń 3-6 mln teńge aralyǵyndaǵy aqshasyn aldap alǵan», - dep habarlaıdy departamentten.
Nur-Sultan qalalyq Polıtsııa departamenti alaıaqtardy qolǵa túsirýde kómek kórsetýdi suraıdy. Joǵaryda atalǵandardyń qaıda ekenin bilgen azamattar 8(7172)71-60-22, 8-778-638-88-70, 8-701-716-41-20 nemese 102 nómirine habarlasa alady. Polıtseıler alaıaqtardy ustap bergen adamdardyń attary eshqaıda jarııalanbaıtynyna ýáde berip otyr.
